Ekainaren 20an "Doktorego Eguna" ospatu zen Bilboko Bizkaia Aretoko Mitxelena Auditorioan, "Zabaldu atea gure doktoregoari" lelopean. Montse Maritxalar graduondoko eta etengabeko prestakuntzako errektoreordeak gidatu zuen ekitaldia, eta Rikardo Bueno Zabalo Basque Research and Technology Aliance - BRTA Euskal Partzuergo Zientifiko Teknologikoko zuzendari nagusiak parte hartu zuen, "Doktoreak zentro teknologikoetan eta unibertsitateaz kanpoko ikerketa-zentroetan: prestakuntza eta laneratzea" izeneko hitzaldiarekin. Gotzone Barandika DOKeko zuzendariak aurkeztu zuen doktorego-ikasketen eskaintza, eta gaur egun 67 programa ditu.

Eva Portillok, Doktorego Eskolako zuzendariorde eta idazkari akademikoak, 2020/21 eta 2021/22 ikasturteetako aparteko sariak banatu zituen, 97 sarituetatik 27 bertan zirela. Saritutako doktoreetako batzuek beren ikerketen emaitzak aurkeztu zituzten, eta EHUagenda 2030 definitutako Garapen Jasangarriko Helburuekin (GJH) lotu zituzten.