Hesi Berdea proiektuak Naturan Oinarritutako Estrategien eraginkortasuna aztertzen du, kutsadurarekiko esposizio handia eta eremu berdeetarako sarbide txikia duten hiri-inguruneetan ikasleen osasuna hobetzeko irtenbide gisa.

Ingurumenaren eta akustikaren kutsadura osasunaren faktore erabakigarria da, eta garrantzi handiagoa hartzen du hiri-eremuetan, saihestu daitekeen heriotza-kausa garrantzitsuenetako bat baita. Kutsadurak osasunean duen eragina bereziki garrantzitsua da populazio kalteberenetan, hala nola haurrengan. Hiri-dentsitate handiko eremuetako eskola-inguruneetan kutsadura handia izaten da, batez ere eskolen inguruko trafikoagatik. Gure testuinguruan egindako azterlanek erakutsi dute eskola-inguruneetako kutsadura-mailek garrantzi handia dutela osasun-aldagaietan eta faktoreetan, hala nola errendimendu akademikoan edo haurren obesitatean. Ingurumen-kutsadura osasunean desberdintasun sozialak eragiten dituen faktore bat ere bada. Naturan oinarritutako konponbideak tresna eraginkorrak izan daitezke kutsadura hori murrizteko eta, gainera, naturarekiko esposizio handiagotik eratorritako osasun-abantaila erantsiak eskaintzeko.

Azterlan honen bidez, ingurumen-kutsadura eta kutsadura akustikoa murrizteko horma berde bat jartzearekin batera, haurren osasuna eta ongizatea hobetzea eta eskola-komunitateak Bilboko Atxuriko eskolan horma berdeari buruz duen pertzepzioa ebaluatu nahi dira.

Proiektu honek eremu honetan ebidentzia sortzen laguntzeaz gain, kutsadura-maila handia eta berdeguneetarako sarbide txikia duten beste eskola edo auzo batzuetan horrelako konponbideak erabiltzeko jarraibideak eman nahi ditu. Naturan oinarritutako irtenbideek abantaila garrantzitsuak eskaintzen dituzte, ez bakarrik kutsaduraren aurrean oztopo gisa funtzionatzeko duten gaitasunagatik, baita hirian natura egoteak berez osasunean eta ongizatean eragina duelako ere.

Gainera, eta ingurumenaren kutsadurarekiko esposizioaren aldagai soziala kontuan hartuta, neurri honek osasuneko desberdintasun soziala murrizteko potentziala du. Osasunaren hobekuntza eta osasun-arloko desberdintasunak murriztea dira gizartearen ikuspegitik helburu garrantzitsuenetako bi.

Proiektua Eusko Jaurlaritzako Etxebizitza eta Garraio Sailak finantzatu du (BAI+D+i programa), eta BioDonostiak, Talaiak, Atxuri Eskolako Guraso Elkarteak eta eskola-komunitateak, baita UPV/EHUko OPIK ikerketa-taldeak ere parte hartzen dute. 

Proiektuaren azalpen bideoa: https://www.youtube.com/watch?v=_AMkSkTpa18

Ikusi Hesi Berdearen instalazioa eta lehen neurketak: https://www.youtube.com/watch?v=vDsmDj9ZQVY