Kalitate eta Ebaluazio Instituzionaleko Zerbitzuak, UPV/EHUren antolaketaren esparru guztietan kalitatearen kudeaketa ezagutzen, ezartzen eta hobetzen laguntzeko, prestakuntza-programak garatzen ditu gure unibertsitate-erakundeko pertsonengan kalitatezko kultura areagotzeko, eta, bereziki, erantzukizuneko karguak dituzten edo izan ditzaketen pertsonengan (bai irakasleengan, administrazioko eta zerbitzuetako langileengan, bai ikasleengan).

Horregatik, kudeaketa integralarekin lotutako gaitasunak eskuratzeko prestakuntza ematen du, batez ere plan estrategikoak zehaztu eta hedatzean, ikastetxeko prozesuen mapa zehaztu eta hedatzean, ikastetxearen kudeaketaren emaitzak neurtzen dituzten adierazleak zehaztu eta hedatzean, ikastetxeko titulazioen jarraipenean eta zentroak bere kudeaketa-sistema osoa berrikustean. UPV/EHUko barne-ebaluatzaileen prestakuntza ere egiten du.