Shakespeareren sonetoak Juan Garziaren ahotsean
144. Maitasun bi ditut, gozo eta min
Maitasun bi ditut, gozo eta min,
bi izpiritu beti kitzikari:
betargi bata, giza aingeru fin;
emea, berriz, musubeltz gaitz-kari.
Ona gaiztoak maltzur tentatu du,
ni infernura ekarrarazteko,
limurtu nahiz santua deabru,
gogo-aratza kutsu txarron peko.
Aingeru ona gaiztotu ote den
ezin esan, nahiz susmoa dudan:
lagun izanik hirurok elkarren,
kide duke besteak infernuan.
Hau bizi beharra duda artean,
gaiztoak handik iraitzi artean.