Shakespeareren sonetoak Juan Garziaren ahotsean
142. Maitasun dut hoben; zuk bertute fin
Maitasun dut hoben; zuk bertute fin
Herra, hoben horren higuin gogorra.
Konparatuz bata bestearekin,
ez duket merezi hain epai txarra;
ez bederen zure ezpainotatik,
gorriminon ondra galdua denez,
hainbat itun faltsu zigilaturik,
jabetuz inoren ohe-mozkinez.
Zilegi dut, bada, zu maitatzea,
nola zuk soz gogatzen dituzunak;
gupida-hazia gaur landatzea
zuhur luke zure etorkizunak:
ukatzen duzuna galde eginez,
ukoa zenuke zeure arauez.