Shakespeareren sonetoak Juan Garziaren ahotsean
123. Ez harrot, Aldi, ez, aldagaitz bainaiz
Ez harrot, Aldi, ez, aldagaitz bainaiz:
hire piramide izugarriok
ez zaizkidak deus berri, deus ulergaitz:
ikusi-zaharrek jantzi berriok.
Labur dituk gure egunak; hala,
miresten diagu hire lan dena
geure oldetik bagenu bezala,
ostendurik lehendaniko sona.
Mira gabe axut, hiri zein hire
kronikei, orainaz zein iraganaz,
gezur baitiote haiekin gure
soek, handi-txikituz hire presaz.
Zin degiat, Aldi, kalte guztizko:
fidel nauk eta izanen betiko.