Shakespeareren sonetoak Juan Garziaren ahotsean
102. Sendo dut Maitasun motel-itxuraz
Sendo dut Maitasun motel-itxuraz;
ez da, ez, kanpoko distira neurri:
salgai da amodio hori zeinaz
jabeak ozen dagien aldarri.
Gure maitasuna artean baitzen
udaberri huts, orduan nik oles,
Filomenak nola uda kantatzen,
gero baratua sasoia heltzez.
Ez du xarmarik galdu orain udak
gau-liluron txirula isildurik;
basa-soinuoz umoak bazterrak,
gozoak arruntuz ez da gozorik.
Haren gisa mututzen naiz ni noizbait,
neure kantuaz ez zaitzadan gogait.