Shakespeareren sonetoak Juan Garziaren ahotsean
101. Musa estakurutsu, erru latza
Musa estakurutsu, erru latza
ez al dun, ederrez benaz ahantziz?
Eder-bentasuna Maitegan datza;
hi ere horrek hau janzten duin-jantziz.
Erantzun, Musa. Ala ausaz dion:
«Ez du beharrik Egiak margoen,
ez Edertzak pintzelari darion
deusen: onena, nahasteka onen»?
Hura hain konpli delako mutu hi?
Ez hala zurit isila: hi baitan
baitago urre-hilobiz haraindi
dirauen aintzatsu gizaldietan.
Ekin lanari, Musa: gaurtik ikas
luzaz irudikatzen orain denaz.