Biografia

Kimikan lizentziatua (petrokimika) da eta 2000. urtetik Euskal Herriko Unibertsitateko Gipuzkoako Ingeniaritza Eskolan ikerkuntza lanean ari da. Bere doktoregoa Iñaki Mondragon Katedradunaren zuzendaritzapean burutu zuen. Kimikako eta Ingurumeneko Ingeniaritza Saileko irakasle titularra da, eta Gipuzkoako Ingeniaritza Eskolako Unibertsitate eta Enpresa Gelako zuzendaria.

Ikerketa

Iturri berriztagarrietatik eta birziklagarrietatik lortutako molekuletan erabat edo partzialki oinarritutako material berriak prestatzea, ezaugarritzea eta optimizatzea du helburu. Ildo horretan, novolaka motako fenol-erretxinak eta tanino kondentsagarri eta hidrolizagarridun erresolak aldatzearekin lotutako lanak egin ditu, automozioaren eta ijezketen fabrikazioaren industrian erabiltzen diren itsasgarri horien sintesian erabili ohi diren fosil jatorriko lehengaien edukia murrizteko. Gainera, ore zelulosiko bereziak fabrikatzeko papergintzarekin lotutako hainbat proiektutan parte hartu du, baita biofingintzakoetan ere (ligninak ateratzea), guztietan nekazaritzako eta basogintzako hondakinen biomasa erabiliz. Bere ikerketa-ibilbidean garrantzi berezia duen beste arlo bat filmak, konpositeak, nanokonpositeak eta geruza anitzeko materialak prestatzea da, matrize proteikoak erabiliz, batez ere gelatina, baita poliester termoplastikoa eta karbohidrato motako makromolekulak eta landare- eta animalia-jatorriko zuntzak ere.

Gaur egun, ekonomia zirkularraren arloan kokatzen diren hainbat proiektu garatzen ari da, kontsumo osteko material polimerikoen (itsasokoak, hirikoak, nekazaritzakoak) eta industria-ondokoen birziklatze termomekaniko eta kimikoarekin lotuta. Gainera, eragile eta enpresekin lankidetzan aritzen da industria-sinbiosia sortzeko azpiproduktuen balorizazioan.

autonomiko, nazioko eta nazio-arteko 43 ikerketa-proiektutan parte hartu du. Halaber, 30 ikerketa-kontratutan parte hartu du hainbat enpresarekin (18 IN gisa). Bere ikerketaren emaitzak nazioarteko hainbat aldizkari zientifikotan argitaratu dira (40 argitalpen, 22ko h balorea) eta 5 liburu-kapitulutan.