Sail honen helburu nagusietako bat ahal den heinean zientziaren aurrerapenean eta garapenean laguntzea da, hain zuzen ere, Ekonomia Aplikatuan eta Ekonomiarako eta Enpresarako Metodo Kuantitatiboetan, edo antzeko arloetan; besteak beste, Ekonomia Analisiaren Oinarrietan, Finantza edo Estatistika Ekonomian eta Ikerketa Operatiboan. Helburu hori lortzeko, irakasleek banaka edo taldean garatu ohi dute beren ikerketa-jarduera, eta komunikazioen bidez ezagutarazten dute, biltzar zientifikoetan, aldizkari zientifikoetan artikuluak argitaratzen, liburuak argitaratzen, etab.

Sailak finkatutako bi ikerketa-talde mantentzen ditu: Ekonometriako Ikerketa Taldea (Econometrics Research Group, ERG) eta Aldagai Anitzeko Analisiaren, Optimizazioaren eta Egozpen Tekniken Ikerketa Taldea. Bi taldeetako ikertzaileak Eusko Jaurlaritzaren edo EHUren ikerketa-proiektuen deialdi publikoetara aurkeztu ohi dira, nola estatu mailakoetara, hala Europa mailakoetara. Hala, normala da edozein unetan Sailean hainbat ikerketa-proiektu egotea, indarrean.

Saileko irakasle-doktoreek Master-programetan irakasgaiak emateaz gain, Masterreko ikasleen lehenengo ikerketa-lanak zuzentzen dituzte, alegia, Master Amaierako Proiektu gisa aurkezten direnak; eta kasu batzuetan, behin masterra amaitu ostean, Doktoregoarekin jarraitzeko erabakia hartzen duten ikasleek doktorego-tesiak zuzentzen dituzte.