Shakespeareren sonetoak Juan Garziaren ahotsean
062. Buru-maitasunezko hobena zait
Buru-maitasunezko hobena zait
begi, arima, guztiaz jabetu;
ez du ahalmenik ezein sendagaik,
bihotzean baitzait sakon sustraitu.
Inork ez duke honelako xarma,
ez itxura fin, ez fintasun benik;
neu bainaiz neurea neurtzen dudana,
inor ere ez da ni beste denik.
Alta, mirailak neure larru-mintza
erakustez arrail, zaharkindurik,
neurekoitasunak berak darauntsa:
zer itsuskeria, buru-maiterik.
Zu zaitut, ene ni-ni, aintza-lore:
neure adina edertzen dut zure.