Shakespeareren sonetoak Juan Garziaren ahotsean
048. Nolako artatsu, bidez abian
Nolako artatsu, bidez abian,
gorde nuen zertxo bakoitza bermez,
esku faltsuk heltzeka itzulian
seguru hantxe aurkitzeko ustez!
Zure aldean, baina, huskeria
bitxiok, oi gozo samin bihurtu,
kutunen kutun, ene zer guztia:
aise zaituzke edonork lapurtu.
Ez zaitut kutxa batean zerratu,
baizik ez egonik berdin zauzkadan
bularpe amultsu honetan sartu,
non jin-joana den gogo-boladan.
Hortik galtzeko ere banaiz beldur:
zure irrikaz, zintzoena lapur.