Shakespeareren sonetoak Juan Garziaren ahotsean
029. Fortunak eta famak huts eginik
Fortunak eta famak huts eginik,
sarri dut neure galdua penatzen,
zeru mutua oihuz gogaiturik,
araoz kexu ene zorigaitzen,
halakoz aberats denaren bekaitz,
haren pare nahi; jendeen kutun,
hau bezain trebe, hura bezain kapaz:
gozo-afanez naiz goseti zuntzun.
Neure buruaz arnegu betean,
zutaz nauzu gero oroitzen, eta,
larretxoria goiz-txintan nola, han
noa kantari zerurantz hegaka.
Zure oroit hutsez hain naiz aberats,
erregeak ene aldean eskas!