Shakespeareren sonetoak Juan Garziaren ahotsean
149. Ez esan, oi krudel!, ez zaitudanik
Ez esan, oi krudel!, ez zaitudanik
maite, neure aurkari bainaiz zure
alde. Naizen guztia ez al dut nik
zugatik ahanzten, tirano neure?
Higuin zaituenik nor dut nik lagun?
Gaitzi zaizunik nor balakatzen dut?
Gaitzetsi banauzu, ez al dut jardun
nik neure kontra, doluturik arrunt?
Zer onbide dut neugan aintzat hartzen
hain harro denik non ez zaizun otsein,
txar oro baitizut onenaz gurtzen,
huts egin gabe begi-zirkin ezein.
Segi, baina, ni higuintzen; badakit:
ez duzu maite ni lako itsurik.