Shakespeareren sonetoak Juan Garziaren ahotsean
114. Ausaz gogoa, zu zaren koroaz
Ausaz gogoa, zu zaren koroaz,
errege-ustez edendurik daukat?
Ala fida naiteke neure soaz,
alkimiazko maite-amarru bat
baitarabil, munstro, izaki dorpe
oro zu lako kerubin bihurtuz,
txarretik eginez on bete-bete
bere izpi sorta baten ukituz?
Aurrena, noski: balakua baitut
soan, harro dagi gogoak topa;
begiak, gustu horri gustu, zurrut-
gai egokiz dio prestatzen kopa.
Zital bada, arin du hark hobena,
begia baitzen zaletu aurrena.