Shakespeareren sonetoak Juan Garziaren ahotsean
031. Zure bularra bihotz oroz bitxi
Zure bularra bihotz oroz bitxi,
hiltzat baitzituen gogo etsiak;
maitagune fin, maite-erakutsi,
hortxe nik lagun ehortzi-usteak.
Zenbat malko kutun ez ote die
Maitasun on-larrik begioi ostu,
hil haien alde, zeinak gorde bide
baitira zu baitan eskurik esku!
Maitasun ehortzik zu bizi-hobi,
joan zirenen oroigailuz apain;
nigandik zuten oro haiek zuri:
anitzena zen, zuhaurena orain.
Haien irudi zaitut nik, maite, zu;
zuk ni, berriz, guztien oro nauzu.