Gelidium corneum alga gorriak 3 eta 12 metro arteko sakonera duten belardi zabalak eratzen ditu. Bere fronde malguak olatu handiekin bizitzeko aukera ematen dio eta bere egitura bertikal iraunkorrak ornogabeen eta arrainen bizitza ahalbidetzen du.

Azken urteotan aldaketa dramatikoak gertatu dira: Geldidium corneum algaren frondeak argalagoak eta koloregabetuagoak daude, beren adarretan ahulago bihurtuz eta dentsitatea galduz, erabat desagertu arte. Eremu handiak daude alga hori gabe. Horren ordez, Falkenbergia rufolanosa eta Codium decorticatum bezalako alga oportunistek betetzen dituzte orain espazio ireki horiek. Eta sakonerako lehen metroetan Paracentrotus lividus itsas trikua oso ugaria da. Nora joan dira gainerako espezieak?

UPV/EHU Itsas Bentos ikerketa-taldeak duela hamarkada batzuetatik aztertzen ditu ekosistema horiek, flora eta fauna bentonikoaren aberastasuna eta ugaritasuna erregistratuz. Organismo horiek ekosistemaren osasunaren adierazle dira, ingurumen-baldintzak integratzen baitituzte, substratuari finkatuta bizi direlako. Gainera, elikadura-katearen oinarria dira. Haien osasun-egoeraren mende espezie ugari daude, gizakia barne.

2010. urtean, Gelidium corneum algaren gainbeheraren arrazoiak ezagutzeko ikerketa bat hasi zen. Argia eta tenperatua haren biokimika, fisiologia eta morfologian duen eragina aztertu zen. 3 eta 5 metro arteko banakoen transplanteak ere egin ziren, argi-intentsitatearen aldaketak simulatzeko. Erradiazio handieneko frondeak estresatuenak ziren, produktibitate txikiagoarekin, horitze handiagoarekin eta frondearen narriadura handiagoarekin. Badirudi argia faktore erabakigarria dela Gelidium corneum algaren osasunean. Hala ere, beharrezkoa litzateke azterlan hau zabaltzea, beste ingurumen-faktore batzuekiko elkarreragina ezagutzeko.

Gelidium corneum algaren gainbehera orokorra da Bizkaian. Gelidium corneum alga gorria funtsezkoa da ekosistema honetarako: gainerako espezieak haren mende daude. Desagertzen bada, gainerakoek ere egingo dute. "Maite dena bakarrik babesten da, eta ezagutzen dena bakarrik maite da".

Bideoaren ideia eta errealizazioa: Alberto Santolaria eta Mila Márquez (Nakusarbe Elkartea)

Musika: “Izarren Hautsa” (Xabier Lete/Mikel Laboa) eta “Tango para Calude” (Elur Arrieta eta Iraide Sarria)