Shakespeareren sonetoak Juan Garziaren ahotsean
096. Zenbaitek zaitu gazte-putz lizuntzat
Zenbaitek zaitu gazte-putz lizuntzat;
zenbaitek zauzka gazte-xarmaz jator.
Zuri zein beltzok, nork ez zuri ontzat:
Dohain da Akats, zugana badator.
Erreginak eraztunean luen
harri kaxkar miretsi bat bezala,
horra hor egia zure erruen:
zeuk zuritzen beltz oro berehala.
Zenbat bildots ez luke Otso larrik
bildots-begiz jantzirik limurtuko!
Zenbat so-egile otzan galdurik,
zure arteak jarriz gero gaizto!
Utikan, ordea: hain maite zaitut,
zurea ene, izen ona baitut.
(Dohainik hitsen akats finok, baina,
akastuz gero zeu zaren dohaina!)