Shakespeareren sonetoak Juan Garziaren ahotsean
088. Noizbait zuk naukezunean gaitzetsi
Noizbait zuk naukezunean gaitzetsi,
ezdeus iritzirik begi zorrotzez,
zure fabore duket buru-auzi,
zintzo aitortuz zu, zin-hausle ordez.
Neure tatxez neu bainaiz jakitunen,
molda dezaket zure alde ipuin
halako bat neure erru gordeen;
ene galtzea, zuri aintza gordin.
Hala, ni ere, galtzez irabazle:
zugan jarririk maite-pentsu oro,
neure buruari irain-egozle,
zure abantailaz, nik areago.
Hain zaitut zu maite, hain naiz ni zure,
zure zuzenez, oker oro neure.