Shakespeareren sonetoak Juan Garziaren ahotsean
008. Musika ezti, zertan zuk tristerik
Musika ezti, zertan zuk tristerik
dantzuzu musika, gozotan gozo,
gogoko duzunaz poztu gaberik,
edota gogait eginaz eroso?
Soinu harmoniaz akordatuon
ezkontza ozenak mintzen bazaitu,
noski da kexu delako zureon,
bakar-doinuz soilik baitzara gaitu.
Hari bat beti da senar besteren,
zintzo eginez oihartzun elkarri;
aita, haurra, ama kantuz pozarren,
nota berean baturik irudi;
doinu hitz gabea, anitz eta bat,
zuri kantari: «zeu soil, deusez zauzkat».