Shakespeareren sonetoak Juan Garziaren ahotsean
076. Zergatik nabilen gala berriz motz
Zergatik nabilen gala berriz motz,
alda-oldeei kontrakar erabat?
Zergatik ez naizen so-fintzen bertsoz,
aintzat harturik puntarengo modak?
Zergatik naizen hain mudagaitz elez,
solas jakinean lotua berdin,
non hitz bakoitzak baiterizt izenez,
ozen salatuz norengandik den jin?
Jakizu, laztan: zu zaitut gai bakar,
zutaz amodio, amodioz zu;
zaharra berri dute hitzok indar,
xahutua txanpon, erraustua su.
Ekia egun oroz berrit-zahart,
nik maite-esan maiz esana dakart.