Shakespeareren sonetoak Juan Garziaren ahotsean
007. Argi gurenak sortaldetik hara
Argi gurenak sortaldetik hara
suzko burua jasotzean, begi
azpiko orok dio so-jaidura,
agur eginez bikaintasun horri;
gero, zeru-malda garaia igoz,
gazte sendo antzo baita lorian,
so hilkorrak eder-gurtzera datoz
urrezko haren erromesaldian;
goratik, baina, gurdi-abaildurik
hondoratzean adinaren zamaz,
begiak doaz so-ihesi handik,
bestetaratuz anarteko miraz.
Zu ere, zeure eguerdiz hara,
berritu ezik, so-zurtz hilko zara.