Shakespeareren sonetoak Juan Garziaren ahotsean
059. Ez bada deus berririk, baizik dena
Ez bada deus berririk, baizik dena
aurrez izan bada, garunok zertan
izorra, unaturik asmamena
sortu zaharraz erdi-beharretan?
Ailiezat oroitzak atzeranzko soz,
bostehun eki-biraz gibel, zure
itxura ager, lehen izkribuoz
noiztik baita gogoa karaktere,
ikus nezan antzinaroak zertsu
liokeen zaren mirari finaz;
gu garen ala haiek gehientsu,
ala berdin dion aroen jiraz.
Talentu zaharrok, inola ere,
gai kaxkarragori aintza-ohore.