Shakespeareren sonetoak Juan Garziaren ahotsean
005. Oren joanek fin landu baitzuten
Oren joanek fin landu baitzuten
begien gozo begi-eder hori,
tirano legez kasu ez dezaten
eder-gozo oro bihur galzori.
Zeren tai gabe Aldi larrik baitu
negu galgarrirantz bultzatzen uda:
izerdia lei, hostoak airatu,
ederra elurpe, biluz natura.
Hala, ez balitz uda-irazpenik
lurrin-ur atxilo kristalez hersten,
Ederrekin haren tasuna hilik,
ezin ezerk oroit zendua zer zen.
Liliek, lurrin-irazirik, neguz,
izatez diraute, begitik galduz.