Shakespeareren sonetoak Juan Garziaren ahotsean
038. Zer dabil ene Musa ele bila
Zer dabil ene Musa ele bila,
zu hor ukanik bertsoa arnasa
biziz betetzeko, gaia duela
paper arruntak biltzeko demasa?
Zerorri eskerrak, nigan izkribuz
sorik merezi dizun deus badago;
ezen nor da hain mutu luma-kamuts,
non zuk argituz motel den zeharo?
Zarela, bada, hamargarren Musa,
bederatzi hain goratuen goren;
hots degizunari, eman sor-hatsa,
neurtitz-zituek betiko dirauten.
Hain musa-motz neu, mira bil badezat,
eneak lorrak, loria zuretzat.