Shakespeareren sonetoak Juan Garziaren ahotsean
023. Antzezle moldegabea irudi
Antzezle moldegabea irudi,
taulen gainean ikarak galdua;
edo piztia suak hartu hori,
indarren larregiz bihotz-hustua;
hala dut nik kili-kolo lardasten
maitasun-solas zehatz egokia,
sobera maitatzez indargabetzen
maitezko neure kemen oldartia.
Bira, bada, idazkiok albiste,
bihotz hitz-nahi baten igarkari;
maitezko ordain galdez, sari eske,
mintzo mutuz ozen zaizkizu ari.
Zantzu isilok irakurtzen treba;
begiz entzutea maitalege da.