Shakespeareren sonetoak Juan Garziaren ahotsean
002. Berrogei neguk setio-lubakiz
Berrogei neguk setio-lubakiz
zure kopet-zelai fina harturik,
gazte-gala hori polit-estalkiz
gabet dadinean, tarrataturik,
inork galdeturik Eder nora den,
non den loria-egunon altxorra,
zeure begi sakon hondoratuen
lotsak janen dizu ospe alferra.
Bai harro, aldiz, sasoi horren finaz,
esangai bazina: «Neure haurrak nau
ederki kitatzen adin galduaz».
Hala, ondorez, zuhaur eder-arau!
Berrit zintezke zahartu ostean,
odolbero hartan zeure hoztean.