Shakespeareren sonetoak Juan Garziaren ahotsean
069. Begi-bistako zure alderdirik
Begi-bistako zure alderdirik
ez lezake emenda asmamenak:
mihi orok dizu aitor gogotik;
nabarmen baita, ados etsaienak.
Loratzen zaituzte loretan eder.
Hain aintzat zauzkaten mihi berberok
horra, haatik, makur dantzan laster,
begiz haraindi ikusle bizkorrok:
izpirituaren ederrari so,
zorrotz zaituzte neurtzen egitatez;
lander gogartez, nahiz begiz gozo,
zauzkate lore belar txar usainez.
Ez da zer fida kanpoko itxurez:
lur arruntak zaitu kirasten barnez.