Shakespeareren sonetoak Juan Garziaren ahotsean
053. Zer zara izatez? Zerez egina
Zer zara izatez? Zerez egina,
mila itzal arrotz horratzen baita?
Oro izanik errainuz norbana,
zuhaur, soil-soil, itzal ororen Baita.
Demagun Adonis: haren potreta
kopia kaxkar baizik ez da zure.
Helenak beuka arteen arreta:
greziar galaz, zu zeu berriz ere.
Beude udaberri zein udaburu:
bata zure ederraren zantzu doi,
bestea zure oparoa dugu:
kutun den oro, zure-itxurakoi.
Hornitua kanpo-xarma guztiez,
berdingabe zu bihotz iraunkorrez.