Shakespeareren sonetoak Juan Garziaren ahotsean
051. Hala dezaket desenkusa, maite
Hala dezaket desenkusa, maite,
zamari geldoa, urrun abian:
zugandik zertan lasterka noake?:
presak beude, non ez den itzulian.
Zer desenkusa, aldiz, abereak,
hanka-arinen makal zaidalarik?
Ezproika, nahiz eraman haizeak,
ziztu lasterra gelditzat baitut nik.
Ez da zaldirik ene irritsaren
duin denik; amodio bizi baita
—ez haragi sor— irrintziz nabarmen;
bitez hor, bada, maite-zorrok kita:
zugandik gogoz hain mantso joana,
bihoa orain lauhazka zugana.