Shakespeareren sonetoak Juan Garziaren ahotsean
017. Nork sinets hitzok etorkizunean
Nork sinets hitzok etorkizunean,
zaren guztiaz baleude josirik?
Hilobi baita hau zure aldean:
ez dager bizirik zaren erdirik.
Biltzerik banu begion guztia,
neurrizko hitzez graziok neurtiztu,
geroak lioke: «Hau gezurtia:
lurreko zena du zeru-izpitu».
Irribide lirateke idazkin
horituok, agure hitz-putz antzo;
zinez zarena, poetaren sumin,
kanta zahar baten tirako bertso.
Haurrik bazenu orduan bizirik,
hark zintuzke bizi, ez hitzok soilik.