Wall Drawing 2025.Merida
1.- Datuak
- Izenburua: Wall Drawing 2025.Merida
- Artea eta Proiektua: Olabe Basogain
- Teknika: Oihalean inprimatzea
- Tamainia: 3 m x 1.5 m
- Data: 2025eko martxoa
- Tokia: Lehen solairuko Aretoa - Gasteizko Ingeniaritza Eskola
2.- Deskribapena
"Wall Drawing 2025.Merida" formatu handiko instalazio grafikoa da, Bilboko baldosan oinarritutako eredu geometriko batetik abiatuta garatua. Oinarrizko egitura horrek 13 zatiz osatuta dago: zirkulu nagusi bat, lau zirkulu periferiko eta zortzi sektore erradial, eta horien bidez aukera infinituak eskaintzen dira forma eta kolorearen aldetik.
Obra 2.048 baldosa grafikoz osatuta dago, 32 zutabe eta 64 errenkadako sare batean antolatuta. Baldosa bakoitzak oinarrizko ereduaren aldaera bat dauka, eta elkarrekin antolatuta daude egitura bisual handiagoak osatzeko, hala nola basoa osatzen duten zuhaitzak. Forma hauek motiboaren errepikapen eta kokapen sistematikoaren bidez sortzen dira, eta horrela zuhaitz bakoitza unitate grafiko anitzen bidez eraikitzen da, ez baldosa bakar batez
Obra oihalean inprimaketa digitalaren bidez sortu da, 3 metroko zabalera eta 1,5 metroko altuera du ikusgai, eta bereziki bi aldetatik ikusteko diseinatua dago. Horretarako, 6 metro linealeko oihala erabilita, bertikalki tolestuta eta tente jarrita dago. Eskolako sarrerako hall nagusian kokatuta dago, leiho handi baten ondoan, eta barrutik zein kanpotik ikus daiteke.
Instalazioa kanpoko argi naturalaren eta barneko argi artifizialaren eraginpean dago une oro. Horrela, lana aldakorra eta bizia bihurtzen da, bere ingurune arkitektoniko eta atmosferikoarekin etengabeko elkarrizketan.
Euskarri ehunezkoaren arintasuna eta muntaketa-sistema sinplea direla eta, lana era errazean instala daiteke hall-aren hainbat puntutan, erretiratu edo lekuz aldatu daiteke, espazioaren beharretara egokituz. Bere izaera mugikorrak lan bizidun eta malgu gisa aurkezten du, eraikinaren barnean modu askotara bizitzeko gaitasuna duena. Gainera, ehunak ingurune fisikoari era sotilean erantzuten dio: aire-korronteekin dardar egiten du, pertsonen igarotzearekin uhindu, eta horrela, kalitate organiko eta etengabe aldatzen den izaera hartzen du, arkitekturarekin eta eguneroko mugimenduarekin elkarrizketa bat sortuz.
Estetikoki, obrak egitura matematikoa eta irudi sinbolikoa uztartzen ditu. Basoa ez da naturalista, baizik eta abstraktua eta kolore biziz betea (gorria, berdea, horia, urdina), bizitasuna eta erritmoa iradokitzen dituena. Errepikapenaren bidez, aniztasuna eta ordena sortzen dira, ikuspegi anitzetarako aukera emanez: urrundik, osotasun konposatua; gertutik, mosaiko narratiboa.
"Wall Drawing 2025.Merida" Olabe Basogainen lanen estilo kontzeptual eta minimalistan kokatzen da, eta Sol LeWitt, Julian Opie, Michael Craig-Martin eta Daniel Buren bezalako artisten lanekin elkarrizketa estetikoan aritzen da. Forma eta logika bisual argi baten bidez, obra hizkuntza autonomo, irakurgarri eta poetiko bilakatzen da.
Lan hau serie baten parte da, eta Wall Drawing 2025.Napoli izeneko lan osagarri bat du, teknika eta egitura berarekin egina, baina zuhaitzen antolaketa batekin eta koloreen beste paleta batekin. Napoli-k intentsitatea eta energia transmititzen baditu, Mérida-k lasaitasuna eta kontenplazioa eskaintzen ditu. Bi lanek elkar osatzen dute bikote emozional gisa, barneko paisaien esplorazio bisual bat proposatuz.
Proiektua Hezkuntza-gune irekietarako STEAM Arte Kolaboratiboa programaren baitan garatu da, Arabako Campuseko Errektoreordetzaren Unibertsitate Proiekziorako deialdiaren laguntzarekin. Jarduerak gure ingurune eta identitatean inspiratutako estandarte kulturalak diseinatu eta sortzera gonbidatzen du, lankidetza-prozesuen, sormen partekatuaren eta STEAM teknikak sorkuntza artistikoan aplikatzearen bidez. Horrela, lana ez da emaitza bisual hutsa, baizik eta esplorazio, hausnarketa eta sorkuntza kolektiboaren parte ere bada.
