Metodologia

Masterraren metodologiak hainbat teknika biltzen ditu bere baitan, banaka ikasteko metodologia eta taldean ikastekoa, eta biak konbinatzen dira ikaskuntzaren prozesu osoan. Eskola magistralen bidez aurkeztuko dira irakasgai bakoitzaren kontzeptu nagusiak. Mintegietan, ikasleek irakaslearekiko harreman estuagoa izango dute, hainbat arazori konponbidea bilatuz taldetan lan eginda, gai interesgarrien gainean eztabaidatuz edo aurkezpenak eginez. Ikasgelako praktiketan, irakasleak maila handi samarreko arazoei konponbidea bilatu beharko die, betiere ikasleekin elkarlanean arituta. Laborategiko praktiketan eta industria tailerretan, ikasleek aukera izango dute praktikan jartzeko ikasitako ezagutzak eta haien etorkizun profesionalerako beharrezkoak diren gaitasunak garatu ahalko dituzte. Ordenagailu bidezko praktikak egiteko asmoa dago, azken finean kalkulu, simulazio eta proiektuen kontrolerako programak gero eta gehiago erabiltzen dira industrian.

Ebaluazioa

Jarduerak ebaluatzeko zenbait prozedura erabiliko dira, baina horiek alda daitezke irakasgai motaren arabera. Hau da, idatzizko azterketaren bidez neurtuko da zenbateraino bereganatu dituzten ikasleek irakasgai bakoitzaren ezagutzak eta gaitasunak. Irakasgaia kontuan hartuta, probaren balioa azken kalifikazioko % 25 eta %60 artean egon daiteke. Laborategian edo mintegietan, taldean, lan egiteko trebetasunak % 30 eta % 50 artean baloratuko dira. Bakarka egindako lanak, berorien prestakuntza eta jarraipena barne, % 10 eta % 25 artean, eta ikasgelan izandako jarrera, arreta eta abar % 5 eta % 10 artean. Master amaierako lana ebaluatzeko egindako lanaren kalitate zientifikoari eta teknikoari erreparatuko zaio, baita ahozko azalpenari ere.Ebaluatzeko prozedurak eta haietako bakoitzaren pisua irakaskuntza planean daude jasota, irakasgai bakoitzaren ezaugarrien arabera.