-
45.000 ikasle baino gehiagorekin hasi da 2024/2025 ikasturtea UPV/EHUn
-
UPV/EHUk Palestinako poeta baten olerkia gehitu du bere Poesia Pasealekuan
-
Gema Varona Biktimologiako Munduko Elkarteko lehendakari hautatu dute
-
Adimen artifizialak doitasun nanometrikoz detektatzen ditu minbizia eta infekzio biralak
-
Bederatzi urte ditut eta amaren mugikorra erabiltzen dut
Gure Ikertzaileen Europako Gaua badator bigarren aldiz
Programak ingurumenari eta jasangarritasunari buruzko 50 dibulgazio ekintza baino gehiago biltzen ditu, Bilboko hainbat gunetan edo online formatuan zabaltzeko
- Albisteak
Lehenengo argitaratze data: 2021/09/22
Ikertzaileen Europako Gaua from UPV/EHU on Vimeo.
Euskal Herriko Unibertsitateak, Ikerketa Gizartean Zabaltzeko Zuzendaritzaren bitartez, Ikertzaileen Europako Bigarren Gaua antolatu du, aurten Europako Itun Berdeari eskainia. Berrogeita hamar bat ekintza daude jasorik UPV/EHUko 100 ikertzailek baino gehiagok parte hartzen duten programan. Aurreko edizioko mugen ondoren, egoera soziosanitario txarra zela-eta, gaur egungo programaren ezaugarri nagusia presentzialtasuna izango da, ekintza horietako asko Bilboko hainbat tokitan gauzatuko dira eta. Horrenbestez, hiria dibulgazio zientifikoaren hiriburu bihurtuko da, eta ekitaldi hori Bizkaia Zientzia Plaza (BZP) jaialdian egingo direnei gehituko zaie.
Jarduera nagusia ostiralean, hilak 24, egingo da, Europa osoan bezala. Egun horretan, Areatzako kaia zientziaz beteko da, 17:00etatik 21:00etara, Ikertzaileen Europako Gau Azokan. Bertan ezagutu ahalko dira, zuzenean adituen eskutik, UPV/EHUko taldeek GJHekin erlazionatutako eta Europako Itun Berdearekin lerrokatutako ikerketak eta proiektuak: ekonomia zirkularra, klima-aldaketa, biodibertsitatea, eraginkortasun energetikoa, osasuna, kutsadura, material berriak.
Ehun ikertzaile inguruk hartuko dute parte Gauean
Aldi berean, eta Logos Elkartearekin lankidetzan, San Frantzisko auzoan, Fotovoz Bilbao proiektu herritarraren erakusketaren inaugurazioa egingo da (Expogela Bilbao Historikoa, San Frantzisko kalea, 32), Hiri osasuna txokoa (Mariaren Bihotza plaza) eta Aztarna ekologikoa tailerra (San Francisco gizarte etxea, hori ere Mariaren Bihotza plazan). Ostiral gauean, 20:00etatik 22:00etara, urrutiko behaketa astronomiko bat programatuta dago Bizkaia Aretoan, Almeriako Calar Alto kaletik, UPV/EHUko Zientzia Planetarioen Taldeko ikertzaileek gidatuta. Behaketa streamingen bidez ere jarraitu ahal izango da. Bilboko Udalak antolatuta, UPV/EHUren lankidetzarekin, Deustuko Udal Zentroan (Agirre Lehendakariaren etorbidea, 42), berriz, ostiralean hasiko da Conversaciencia/Solasaldiak zikloa, hilaren 27ra arte iraungo duena.
Gainera, egun horietan Bilbora hurbildu eta hilaren 28ra arte, Artea eta Matematika eta Eboluzioa genero ikuspegitik erakusketak ikusi ahalko ditu, biak Bizkaia Aretoan, Kultura Zientifikoko Katedrak eta Ikerketa Gizartean Zabaltzeko Zuzendaritzak antolatuta.
Online prestakuntzak eskaintzen dituen aukera ugariei ere ez zaie uko egin nahi izan, eta modalitate horretaz baliatu da, ikertzaileak eta beren zientzia unibertsitate aurreko ikasleengana birtualki hurbiltzeko eta zientzialariei lotutako aurreiritziak ezabatzen laguntzeko. Horrela, lehenago egindako eskaintzari Zientzia Zirkularra programa gehitu behar zaio, hau da, hilaren 22an, 23an eta 24an bideokonferentzia bidez emango diren 26 hitzaldi laburrez osatutakoa, UPV/EHUko ikertzaileak Lehen Hezkuntzako, Bigarren Hezkuntzako eta Batxilergoko ikasleekin konektatzeko aukera emango duena. 1.850 ikasle baino gehiago ari dira parte hartzen hitzaldiotan.
Zientzia Zirkularra online programak lehen eta bigarren hezkuntzako 1.850 ikasle baino gehiago ditu
Guztira, 50 jarduera baino gehiago egongo dira UPV/EHUk antolatutako Ikertzaileen Europako Gaua. Dibulgazio zientifikorako jardunaldi horrek ikertzaileen irudia hurbiltzea du helburu, haien lana eta gizarteari dakarzkion onurak ezagutarazteko, eta ikasleen artean karrera zientifiko bat aukeratzea sustatzeko estereotipoak gaindituta eta genero oztopoak kenduta.
Jarduera guztiak Europar Batasuneko Marie Sklodowska Curie Programaren proiektu bati esker antolatzen dira. Programa hori G9 unibertsitate taldeko ̶ ̶ Oviedo, Kantabria, Gaztela-Mantxa, Extremadura, Balear Uharteak, Nafarroa, Zaragoza eta Euskadiko unibertsitateek osatutakoa ̶ partzuergoari eman zitzaion.