Abenduaren 13tik 18ra, Kulturari eta Interneti buruzko Tracking Bilbao jardunaldien bederatzigarren edizioa ospatuko dugu Bilborock aretoan, Caosticaren eta Borja Cresporen eskutik.

Aste bizia izango dugu aurretik, eta hainbat emanaldiz gozatzeko aukera izango dugu sei egunez: estreinaldiak, proiekzioak, masterclass-ak, kontzertuak, komedia ikuskizunak, podcast-en zuzeneko grabazioak, hitzaldiak…

Horietan guztietan, gonbidatu apartak izango ditugu gurekin, hala nola Miguel Noguera komiko eta artista polifazetikoa; Carmen Romero youtuber, komiko eta gidoigilea, zeinak komedia ikuskizuna eskainiko baitu Xavi Daura (Venga Monjas) eta Enrique Barrorekin batera; Pedro Vallín idazle eta kazetaria, sareetan presentzia handia duena («Me cago en Godard», «C3PO en la corte del Rey Felipe»); Laura Pérez marrazkilaria (Tótem); «Gora Automatikoa» animazio-filmaren aurrestreinaldia (2022ko Goya sarietarako proposatutakoa), David Galán Galindo, Pablo Vara eta Eshaú Dharma zuzendariekin; SU TA GAR musika taldearen unibertso lirikoari buruzko «Sua» komikiaren aurkezpena; «¿Puedo hablar!» show/podcast-a zuzenean (Perra de Satán eta Esnórquel); Ricardo Lezónen kontzertua (Mc Enroe), Higi Vandis eta Conxita Herrero zuzenean marrazten ariko direlarik…

2021ean, Tracking Bilbaok are ahalegin handiagoa egin du profesionalen arteko eztabaida eta sinergiak sustatzeko; hartara, erdigunean jarri ditu ikus-entzunezko bitartekoak, kultura-kudeaketa eta sormenaren industriak, horien inguruko hausnarketarako, ikaskuntzarako eta ekintzailetzarako gonbita luzatze aldera.

Tracking Industry atalean, Bilbao Ekintzarekin lankidetzan, gorakada izan duen Podcasting-aren industriari emango zaio arreta, eta diziplina arteko proiektuen garapena jorratuko da. Horrekin lotuta, ikus-entzunezko kulturari eta Interneti buruzko jaialdi espezializatuen arteko topaketa planteatuko da, beste hainbat ekitaldiren artean (Serializados Fest eta Carballo Interplay, baita Tracking bera ere).

Beñat Erezuma, euskarazko edukien sortzailea (Euskara Satorra), izango da gure artean; baita zinearen, telesailen eta genero-ikuspegiaren arloan dibulgatzaile diharduten Las Bloody Girls bikotea ere. David Galán Galindo zuzendariak, Netflix-eko «Orígenes Secretos» film arrakastatsuaren arduradunak, masterclass-a eskainiko du.

Era berean, podcast-ei eta eduki digitalei buruzko topaketa egiteko asmoa ere badugu, eta bertan izango dira, besteak beste, Sonia Méndez, Beatriz Cepeda eta J.A. Pérez Ledo. Pernan Goñi Olalde artista bisualak marraztuko ditu zuzeneko graphic recording teknikaz jaialdi topaketa eta podcast-ari buruzko meetinga.

Azpimarratzekoa da azken berritasuna ere: ekoizpena eta sormena sustatzeko ahaleginak indartu ditugu, eta, horri esker, Euskadiko podcast-ik onenak (euskaraz zein gaztelaniaz sortutakoak) saritzeko deialdia jarriko dugu martxan. Sari gisa banatuko dira, besteak beste, zuzkidura ekonomikoak, espazioen lagapena eta grabazio-materiala.

Programazio osoa hemen eskura dezakezue: PROGRAMAZIOA