Balluerkak bere agintaldiko irizpide orokorrak aurkeztu zituen sarrera-hitzaldian, baina baita bere jardunaren ildo nagusiak: "Ilusioz betea eta hunkituta sentitzen naiz, baina zirrararekin batera errektore karguak dakartzan erantzukizunaren eta eskakizunaren jakitun naiz. Zeregin baten emaitzak ezin dira aurretik bermatu, baina kudeatzaile arduratsu batek bai bermatu ditzake proiektu, erakunde eta herri batenganako konpromisoa eta gogoa. Hori da gure kasua".

Errektore berriak esker oneko hitzak izan zituen Euskal Herriko Unibertsitatea zortzi urtez zuzendu duen Iñaki Goirizelaia errektorearentzat, eta urteotan egindako lan eskergaren aintzatespena ere adierazi zion.

Eguraldia lagun izan zuten ekitaldiaren amaieran, kanpoaldean taldeko argazkia egin ahal izateko. Aspalditik, UPV/EHUko errektore taldeek leku berean egiten dute argazkia, Ajuria Eneako kanpoaldeko harmailadian, izendapena gauzatu eta jarraian.