UPV/EHUk ikasturte berrirako eskaintza aurkeztuko du Unibertsitate Orientaziorako Azoketan
92 graduk osatzen dute eskaintza, horien artean hiru gradu bikoitza daude, nazioarteko 20 gradu bikoitza egin daitezke eta hiruretan prestakuntza duala eskuratu ahal da
- Albisteak
Lehenengo argitaratze data: 2018/01/24
![](https://www.ehu.eus/documents/10136/8554469/Ferias+Orientacion.jpg/98e502d1-e84c-fc11-1931-5dad23d89ab9?t=1516794732000)
Larunbatean, urtarrilak 27, 9:00etatik 14:00etara, UPV/EHUko Ignacio Maria Barriola Zentroan eta Carlos Santamaría Zentroan, Donostian (Carlos Santamaria Zentroan osasun arloko ikasketak aurkeztuko dira), Universidad del País Vasco/Euskal Herriko Unibertsitateak egingo dituen Unibertsitate Orientaziorako hiru azoketatik lehena ospatuko du. Gasteizen azoka hurrengo larunbatean izango da, otsailak 3, eta Bilbon otsailaren 10ean, larunbata.
Orientaziorako Azokek aukera ezin hobea eskaintzen diete etorkizuneko ikasleei UPV/EHUren gradu ikasketak gertutik ezagutzeko, hala nola unibertsitatera sartzeko prozedura. Hain zuzen ere, 2018-2019 ikasturtean, Euskal Herriko Unibertsitateak 92 gradu eskainiko ditu hiru campusetan. Horietariko hiru gradu bikoitzak dira, eta hiruren artean bat berrikuntza: Ingeniaritza Mekanikoko eta Industria Elektronikaren eta Automatikaren Ingeniaritzako Gradu Bikoitza datorren ikasturtean ematen hasiko da Gipuzkoako Ingeniaritza Eskolan. Beste bi gradu bikoitzak hauexek dira: Enpresen Administrazio eta Zuzendaritzako eta Zuzenbideko Gradu Bikoitza eta Fisikako eta Ingeniaritza Elektronikoko Gradu Bikoitza. Azken horrek 2017an gutxieneko notarik altuena izan zuen UPV/EHUn: 12,882. Halaber, nazioarteko 20 gradu bikoitza egin ahal dira. Nazioarteko gradu bikoitz horietan, bi unibertsitate titulu lortzen ditu ikasleak, bat UPV/EHU emana, eta bestea atzerriko unibertsitateak. Beste hiru graduetan (Automobilgintzaren Ingeniaritza, Enpresen Administrazio eta Zuzendaritza, eta Prozesu eta Produktuen Berrikuntzaren Ingeniaritza) prestakuntza duala eskaintzen da. Sistema berritzaile horretan ikasleek inguruko enpresetan eskuratzen dituzte hainbat gaitasun.
Unibertsitate Orientaziorako Azoketara interesik duen edonor hurbil daiteke, baina bereziki unibertsitate-aurreko ikasleei, haien gurasoei eta bigarren hezkuntzako irakasleei zuzenduta daude. Bertan UPV/EHUko graduei buruzko informazioa aurkituko dute, eta zentro guztietako irakasleek eta Orientazio Zerbitzuko langileek arreta egin eta zalantzak argitzen lagunduko diete egin behar duten ikasketen aukeraketan, banan-banan zein taldeko informazio-saioen bidez.
Halaber, informazioa jaso dezakete unibertsitatera sartzeko bideen, mugikortasun-programen, graduondokoen, tasa nahiz beken, unibertsitateko ostatu nahiz garraioaren, kirol-jardueren, unibertsitate-orientazioaren eta abarren gainean ere. Nahi izanez gero, Orientaziorako Azokaren egunean bertan, campus bakoitzeko unibertsitate-egoitzak bisitatzeko aukera izango da (larunbat honetan, Donostiako Manuel Agud Querol egoitza).
Gasteiz eta Bilbo
UPV/EHUren Unibertsitate Orientaziorako Azokak hiru campusetan egiten dira; ondoz ondoko hiru larunbatetan. Gipuzkoakoaren ostean, Arabako Campusean otsailaren 3an egingo da, Farmazia Fakultatean (Unibertsitatearen pasealekua, 7) eta azkena Bizkaiko Campusean izango da, otsailaren 10ean, Ekonomia eta Enpresa Fakultatean (Lehendakari Agirre hiribidea, 83. Sarriko, Bilbo) eta Bizkaia Aretoan (Abandoibarra, 3). Azken egoitza horretan osasun arloko ikasketak aurkeztuko dira.
Informazio guztia: www.ehu.eus/eu/web/sou/unibertsitate-orientaziorako-azokak
UPV/EHUk urtero garatzen du Unibertsitatera Sartzeko Programa, unibertsitate-aurreko ikasleek ahalik eta informazio gehien izan dezaten ikasketak hautatu aurretik, eta Unibertsitate Orientaziorako Azokak programa horren baitan kokatuta daude, haren bigarren fasean, hain zuzen. Lehen fasean, unibertsitate-aurreko ikasleei interesatzen zaizkien graduei buruzko Jarduera Praktikoak burutu ziren. Eta, programari amaiera emateko, Ate Irekien Jardunaldiak egingo dira, martxoan. Horietan parte hartzeko, otsailaren 19etik 25era bitartean eman beharko da izena, unibertsitateko web gunean: www.ehu.eus/sou/jardunaldi-irekiak.