FISOCATek hamaika herrialde iberoamerikarren katalisi elkarte nazionalak biltzen ditu, herrialde hauetakoak, hain zuzen: Argentina, Brasil, Txile, Kolonbia, Kuba, Espainia, Mexiko, Peru, Portugal, Uruguai eta Venezuela. 2006az geroztik, bi urtez behin, Ibilbide Zientifiko Bikainaren saria ematen die nazioarteko zientzia eta ikerketa lan oparo eta aitortua duten ikertzaileei.

«Oso pozik nago eta ohore handia da niretzat sari hau jasotzea. Karrera akademiko eta zientifikoaren hainbeste urteko dedikazioa saritzen du, eta nik nirea orain dela 40 urte baino gehiago hasi nuen. Zientziak aurrera egiteko eta zientziak gizarte hobea, garbiagoa eta jasangarriagoa lortzen laguntzeko egindako ahaleginak eta erdietsitako lorpenak, bada, ez dira debalde izan. Nire esker ona adierazi nahi diet FISOCAT osatzen duten hamaika herrialde iberoamerikarretako katalisi elkarteei. Saria eman didatela egungo konfinamendu egoera honetan jakin dut, eta nazioarteko elkartasun balioez ere ohartu naiz. Espero dut errutinara bueltatzen garenean haiei eustea, eta krisi honek erakutsi dizkigun hobekuntzak ere aintzat hartzea», eskatu du Juan Ramón González Velascok.

Katalisiaren arloan, zientziaren, eta ikerketa oinarrizko eta aplikatuaren garapenari eta ikertzaile gazteak prestatzeari ekarpena egin dioten senior ikertzaile iberoamerikarrei zuzenduta dago saria, eta haien ibilbide zientifiko bikaina aitortzen du. Lehen fasean, herrialde bakoitzak (bere katalisi elkarte nazionalaren bitartez) bere hautagai nazionala aitortzen eta proposatzen du, eta, bigarren fasean, nazioarteko batzordeak azken hautapena egiten du.

«Gaur egun, taldean egiten da zientzia. Errekonozimendu hau posible izan da, bada, nire ikertaldeari (Teknologia Kimikoak Ingurumen Jasangarrirako) eta oraingo eta orain arteko taldekide guztien ahaleginari esker. Oso harro nago horrenbeste kolaboratzaile bikain izan ditudalako alboan; bikainak dira zientzian, baita arlo pertsonalean ere. Eskerrak eman nahi dizkiet denei egin duten ahaleginagatik eta taldean konfiantza izateagatik. Saria denona da; ni jasotzen duena izango naiz», aitortu du.

Bere ezaugarri humano eta pertsonalak nabarmendu ditu, gainera, epaimahaiak: «Zintzotasuna eta eskuzabaltasuna». «Ohorea da niretzat lagun asko eta hain onak izatea. Espainiako eta nazioarteko kideek zorion gutun asko bidali dizkidate, eta horrek erakutsi dit zeinen lagun sare handia ehundu dudan nire bizitza profesionalaren urte hauetan», esan du pozik.

Ibilbide zientifikoa

Juan Ramón Gonzalez Velasco, Erandio (1953). Gaur egun, Teknologia Kimikoak Ingurumen Jasangarrirako ikertaldearen buru da. Nazioartean aitortua da taldea katalizatzaileetan egiten dituzten garapenengatik. Horien helburua da automobilen, hiri hondakin solidoak tratatzeko instalazioen (erraustegiak) eta, oro har, produktu kimikoak ekoizteko instalazioetako efluente kutsatzaileen emisioak murriztea.

Hizlari aritu ohi da katalisiaren eta ingeniaritza kimikoaren arloko bilera zientifiko eta biltzar nabarmenetan. Lan ugari egin ditu, garrantzi zientifiko handikoak eta industrian aplikatzekoak, eta inpaktu izugarria izan dute gizartearen egungo erronketan; esaterako, baliabideen eta lehengaien efizientzia hobetzea; energia seguru, garbi eta efizienteko iturriak bilatzea eta, oro har, ingurumena babestea.

Nazioarteko sari honetaz gain, beste sari nazional batzuk ere jaso ditu González Velasco irakasleak. Hauek, besteak beste: Burdinola 2000 saria, erreaktore kimikoen diseinuari egindako ekarpenengatik, eta Euskoiker Fundazioak 2010ean emandakoa, bere garapen zientifikoak ekoizpenaren sektorera transferitzeagatik.

González Velasco irakaslea ikertzailea da, bai, baina, horrez gain, kudeaketa postuak ere izan ditu unibertsitateen eta ikerkuntzaren ebaluazio eta kudeaketa organoetan. UPV/EHUko Ikerketaren arloko errektoreordea eta Zientzia eta Teknologia Fakultateko dekanoa izan zen. Nazioartean, Katalisi Elkarteen Nazioarteko Elkarteko (IACS) idazkaria izan zen, eta Katalisi Elkarteen Europako Federazioaren (EFCATS) Batzorde Exekutiboko kidea, bai eta Espainiako Katalisi Elkartearen presidentea ere. Gaur egun, Ikerketa Zientifikoen Goi Kontseiluaren (CSIC) Presidentetzako Aholku Batzorde Zientifikoko kidea da, eta laguntzen, ekintzen eta ingeniaritzako proiektuen kudeatzailea da Espainiako Ikerketa Agentzia Estatalean, bai eta nazioarteko beste agentzia batzuetako kolaboratzailea ere.