Abenduaren 3a Euskararen Nazioarteko Eguna dugu; aurten ostiral batean suertatu zaigunez, aste osoa hartuko dugu UPV/EHUn euskararen astea ospatzeko. ‘Euskara buruan ibili munduan’ lelopean, ospakizun hauetan parte hartzeko deia luzatzen digute.

“Gure unibertsitateko hainbat lagun eta taldek antolatutako ekitaldietara gonbidatzen zaituztegu ikasle, irakasle, ikertzaile eta administrazio eta zerbitzuetako langile guztiok. Espero dugu programa zabal honetan denok aurkituko duzuela gustuko zerbait”, esan digu Junkal Gutiérrezek, Euskara, Kultura eta Nazioartekotzearen arloko errektoreordeak. Etorri UPV/EHUko Euskararen Astea ospatzera!”

Erakusketak, bertsolariak, hitzaldiak, musika… Astean zehar burutuko diren ekimenen programa osoa kontsultatu, zure campusean zer jarduera dagoen jakiteko.

“Euskararen egunak gure inertziak astintzeko balioko digu, eta euskararen asteak horrek irautea bilatzen du. Euskara lanerako nola gozatzeko, aurtengo egitaraua euskarari aukera desberdinak ematera dator”, adierazi du Junkal Gutiérrezek.

Hona hemen programaren ekitaldi nabarmen batzuk:

• Azaroaren 30an, 13:00etan:

Farmazia Fakultatean (Arabako Campusa), ‘Txosten klinikoak idazteko dinamika’ hitzaldia egongo da Adrian Zelaia eta Unai Larrinagaren eskutik (Aintzat taldekideak).

• Abenduaren 1ean, 18:30ean:

Zientziak eta bertsolaritzak bat egingo dute Bilboko Bidebarrieta Liburutegian eskainiko den Jakinduriek mundue erreko dau! ekitaldian. Ezagutza zientifiko zabaltzeko errima perfektua bilatzea xede duen ekitaldi honetan, Kike Amonarrizekin batera izango dira mikrofono aurrean, Andoni Egaña eta Onintza Enbeitia bertsolariak, Xabier Artaetxebarria ingeniaria, Miren Basaras mikrobiologoa eta Josu López-Gazpio kimikaria.

• Abenduaren 1ean eta 2an, 13:00etan:

Gizarte eta Komunikazio Zientzien Fakultatean (Leioa-Erandio eremua) gure egunerokotasunera euskara eta kultura ekarriko dituzte giro ederrean, Rafa Rueda eta Gotzon Barandiaranek beraien musika saioetan.

• Abenduaren 3an:

Gipuzkoako Campusean, kalejirarekin hasiko da goiza bederatzietan; hamarretan txokolatadara etor zaitezke Ignacio María Barriola zentroko tabernan eguerdiko hamabiak arte. 11:30etan, Barriolako auditorioan, ‘Software librea eta euskara’ gaiari buruzko hitzaldia. 13:00etan, Bagera elkarteak Txilardegi aretoan jarritako erakusketa baten bidez, umorea eta kritika erabiliz, euskararen gaineko diskurtsoen inguruen gogoeta eragingo digu.

19:00etan Bizkaia Aretoan, Txori kantazale eskainiko da. Joana Otxoa de Alaizak (pianoa) eta Alex Gurrutxagak (testuak) sortutako obra honetan, Xabier Leteren barne munduan murgilduko gara.