Bestalde, errektoreak Ikasleen Kontseiluak martxoaren 24rako deitutako etenaldi akademikoaren ondorioz izandako kalteen berri eman du; izan ere, etenaldi hori oinarri, gazte gutxi batzuk hiru campusetako hainbat zentrotan sartu eta pintadak egin zituzten eta altzariak hondatu.  Euskal Herriko Unibertsitateko errektorego taldeak aringarririk gabe gaitzetsi zituen indarkeria ekintza horiek, eta salaketa jarri zuen Ertzaintzan. Baina, orain, uste du garrantzitsua dela gizarteari ekintza horiek ekarri dituzten kalteen berri ematea, kalte horiek ondasun publikoei eragiten baitiete: horiek konpondu beharra dago, eta, beraz, horretan gastatu beharko da beste helburu batzuetarako izan zitekeen diru publikoa. Guztira, unibertsitatearen ondarean eragindako kalteak 55.000 €-koak dira.

Eva Ferreira errektorearen iritziz, “ulertezina da hezkuntza publikoaren alde deitutako etenaldi baten ondorioz ondasun publikoak suntsitzea. Gutxiengo batek eragin zituen ekintza zigorgarri horiek, baina jasota utzi behar ditugu egindako kalteak. Unibertsitate publikoa herrialde honetako pertsona guztien ahaleginarekin mantentzen da, unibertsitatera joan daitezkeen pertsonen ahaleginarekin eta horretarako aukerarik ere izan ez dutenen ahaleginarekin. Guztiei eman behar diegu egiten dugunaren berri, haien ahaleginarekiko errespetu handia erakutsiz, eta jokabide bortitz eta suntsitzaileak irmo gaitzetsiz".