-
45.000 ikasle baino gehiagorekin hasi da 2024/2025 ikasturtea UPV/EHUn
-
UPV/EHUk Palestinako poeta baten olerkia gehitu du bere Poesia Pasealekuan
-
Gema Varona Biktimologiako Munduko Elkarteko lehendakari hautatu dute
-
Adimen artifizialak doitasun nanometrikoz detektatzen ditu minbizia eta infekzio biralak
-
Bederatzi urte ditut eta amaren mugikorra erabiltzen dut
Arte Ederretako ikasleek Pablo Uranga pintorearen formatu handiko pintura bat zaharberritu dute
San Telmo museoarekin sinatutako hitzarmenari esker egin dute lana, datorren udan jarraituko dutelarik
- Albisteak
Lehenengo argitaratze data: 2021/08/04
![Mural Pablo Uranga](https://www.ehu.eus/documents/10136/31491812/mural-pablo-uranga_web.jpg/015f8f72-6b61-ec7b-5a40-2a779e8cf2e7?t=1628055577829)
Euskal Herriko Unibertsitatearen Arte Ederren Fakultateko Kultura Ondasunen Kontserbazio eta Zaharberritze Graduko ikasleek Pablo Urangaren 'Elguetako ehorzketa' pintura lana zaharberritzeko prozesua hasi dute. José Luis Larrañaga irakasleak gidatuta, Oihal gaineko pinturen zaharberritzea irakasgaiaren laugarren mailako 16 ikaslek hartu dute parte zeregin horretan, eta uztailean heldu zioten pintorearen familiak Donostiako San Telmo Museoari dohaintzan emandako obra horren zaharberritzearen lehenengo faseari. Izan ere, zaharberritze lanak Arte Ederren Fakultateak eta San Telmo Museoak sinatutako hitzarmenaren babespean egiten dira, hitzarmenaren helburua izanik ikasleen prestakuntza osatzea eta sakontzea.
Pablo Uranga Diaz de Arcaya pintoreak (Gasteiz, 1861 – Donostia, 1934), Ignacio Zuloaga eta Santiago Rusiñolen garaikideak, Parisen elkarrekin bizi izan zenak, paisaien eta gai historikoen pinturan jarri zuen arreta eta erakusketa ugari egin zituen gure herrialdean eta atzerrian, kritika eta salmenta arrakastatsuak lortuz.
1900. urtean, Bilboko Arte Modernoko 1. erakusketarako, ‘Elgetako ehorzketa’ izeneko oihal gaineko olioa pintatu zuen, 2,60 metro altu eta 5,23 metro zabal. Lanak oso harrera ona izan zuen eta pintoreak berarekin gorde zuen lanerako erabili zituen estudio ezberdinetan.
María Ocejo Vergararen gradu amaierako lanak, 'Pablo Urangaren ‘Elgetako ehorzketa' izeneko lanaren azterketa teknikoa, kontserbazio egoera eta esku hartzeko proposamenak’, sakon aztertu zuen obra, eta aipatutako lan honetan ezarritako jarraibideei jarraituz, Kultura Ondasunak Zaindu eta Zaharberritzeko ikasleek zaharberritze prozesuari ekin diote aurten. Lehenengo fase honen ondoren, non, bereziki, kontserbazio egoera txarrean zeuden eremuetako pintura geruza kontsolidatu eta finkatu den, 2022ko udan lanek jarraipena izango dute graduko beste ikasle batzuekin. "Lan horiek aukera ematen digute formatu handiko eta kalitate tekniko eta artistiko handiko obra bat kontserbatzeko eta zaharberritzeko, Kontserbazio eta Zaharberritze Graduko ikasleei prestakuntza osagarria eskaintzeko eta, aldi berean, fakultatean gordailuan dagoen eta, zein bere kontserbazio egoeragatik esku hartzerik behar duen pintura lan bat zaharberritzeko. Lan horiek udan egin behar dira, ikasturteko eskola aldian ezin baita esku hartu, tailerren tamaina handia eta leku mugatua direla eta ", azaldu du Juan Luis Larrañaga irakasleak.
Irudi galeria
-
Pinturaren hasierako kontserbazio egoera. -
Euskarriarekin itsaspena galdu duten pintura geruzako eremuak finkatzen. -
Pintura geruza nola finkatzen den zehatz-mehatz. -
Kaltetutako eremuak itsasgarrien eta paper japoniarraren bidez babesten dira. -
Egoera txarrean dauden eremu guztiak babestuta. -
Obra biribildu ondoren, atzealdetik desbiribilkatzen da, garbitzeko eta kontserbazio hobea bermatzeko. -
Pintura lana hurrengo zaharberritze faserako prest. -
Obra biribildu egiten da, datorren udara arte gorde ahal izateko.