Gasteizko Foruen plazan aurkeztu dute Bizkor EV02, Gasteizko Ingeniaritza Eskolako Formula Student Vitoria taldearen monoplaza. Ekitaldian izan dira Maider Etxebarria Gasteizko alkatea, Saray Zárate, Ekonomiaren Garapen eta Berrikuntzako foru diputatua, Manoli Igartua UPV/EHUren Arabako Campuseko errektoreordea eta Jon Urresti Vital Fundazioko presidentea.

Monoplaza berria, Bizkor EV02 izenekoa, 2021ean aurkeztutako FSVren hasierako kontzeptuaren bilakaera berri bat da. Ibilgailu berri honek karbono zuntzez egindako txasis berria du eta material konpositeak erabiltzen ditu multzoa arintzeko, motor elektrikoak ditu lau gurpiletan trakziorako, bai eta beste garapen handi batzuk ere, hala nola kit aerodinamiko eboluzionatu eta osoa.

Formula Student Vitoria (FSV) proiektu bat da, goi teknologiako monoplaza planifikatzeko, diseinatzeko eta fabrikatzeko faseak konbinatzen dituena. Ikasleek modu autonomoan eta autodidaktan egiten dute lan, lankidetza estuan oso tokiko industriako eragileekin, ikaskuntza oso praktikoa lortzeko eta etorkizunean ingeniaritzaren hainbat alorretan aplikatuko diren berrikuntzak garatu ahal izateko. Lehiaketa taldea unibertsitateko 40 ikaslek osatzen dute eta Gasteizko Ingeniaritza Eskolan du egoitza.

"Unibertsitate gisa harro gaude nazioartean aintzatetsitako lehiaketa baten parte izateaz, mundu osoko 100 taldetako 3.000 ikasle baino gehiago biltzen baititu -adierazi zuen errektoreordeak aurkezpenean-. Formula Student proiektua, zalantzarik gabe, prestakuntza-esperientzia paregabea da, eta funtsezko hiru elementu uztartzen ditu: berrikuntza, talentua eta dedikazioa. Berrikuntza nabaria da; izan ere, urtero azaldu diguzuen bezala, teknologia eta material berriak txertatzen ari zarete, ingeniaritzaren hainbat alorretan etorkizunean aplikazioak izango dituztenak. Talentua agerian geratzen da zuen ezagutzak eta trebetasunak anbizio handiko proiektu baten alde aplikatzeko gaitasuna duzuela erakustean. Eta dedikazioa ezinbestekoa da, emaitza nabarmenak lortzeko, dakizuenez, lanordu eta esfortzu asko behar baitira".

Aurten hainbat probatan hartuko dute parte Formula Student motorraren formatuaren barruan, jada hiru lehiaketatan onartua izan baitute sailkatze proba ezin gogorragoak gaindituta, hots: Silverstoneko zirkuitu ingelesean (FS ImechE UK, uztailaren 19-23an); Castelo Brancoko proba berritzailean (Formula Student Portugal, uztailaren 31tik abuztuaren 6ra); eta Montmelóko Circuit de Catalunya proba klasikoan (Formula Student Spain, abuztuaren 6-12an).