UPV/EHUk antolatuta eta Bizkaiko Foru Aldundiko Enplegua, Gizarte Kohesioa eta Berdintasuna sustatzeko Sailak finantziatu eta bultzatutako 3R Gaztea programa (gaztelaniaz honako hau nahi dute esan 3 r-ek: birorientatzeko, birkualifikatzeko eta birkokatzeko) atzo aurkeztu zen Bizkaia Aretoan, eta azken hiru ikasturteetan graduko edo master ofizialeko unibertsitate-titulu ofiziala lortu duten, 2024an 30 urte baino gehiago bete ez dituzten, programa hasi aurretik EHUalumni sarean inskribatuta dauden eta Bizkaiko Lurralde Historikoan erroldatuta dauden pertsonei zuzenduta dago.

Aurten 160 pertsonak eman dute izena, eta tutore batek lagunduko die prozesu osoan zehar, haien enplegagarritasuna sustatzen duten tresnak eskainiz. Hala, hautaketa-prozesuetan jarduteko modua landuko da, zeharkako gaitasunak identifikatzeaz gain, indarrean dagoen lan-araudiari buruzko informazioa ere emango da.

"3R Gaztearen ezaugarriek programa ezin hobea bihurtzen dute UPV/EHUko graduatuen enplegagarritasuna hobetzeko. Izan ere, programa hori guztiz bat dator unibertsitatetik enplegagarritasunaren arloan egiten ari garen jarduerekin ", adierazi zuen Fernando Tapia UPV/EHUko Ikasleen eta Enplegagarritasunaren errektoreordeak.

Halaber, programak parte-hartzaileei lagunduko die lan-merkatuan sar daitezen, enpresekin topaketak eginez (enplegu-foroak) eta lan eskaintzak eskuratzeko planak diseinatuz. Enplegu-eskaintza potentzialen prospekzioa eta identifikazioa ere ez da faltako, eta lanpostuak dituzten jarduera ekonomikoko sektoreak identifikatuko dira eta lanpostu horien lanbide-profilak aztertuko dira.

Bestalde, Bizkaiko Foru Aldundiko Enplegu zuzendari Susana González Romulok azaldu duenez, programak 861 pertsonaren parte-hartzea izan du 2020an hasi zenetik (emakumeen % 60) ehun bat enpresatan, eta 300 laneratze baino gehiago lortu ditu.

"Ezinbestekoa da talentu gaztea sortzen eta fidelizatzen laguntzea, gizarte kohesionatua eraikitzeko. Gazteak gizarte baten baliorik garrantzitsuena zarete, orainaren eta etorkizunaren eragile zarete eta, zentzu horretan, enplegu baterantz laguntzeko inbertsioa, praktikan, gizarteratze eta kohesio sozialeko politika bat da ", gaineratu zuen.

Era berean, González Romulok bakarrik ez daudela adierazi die hurbildutako gazteei, Bizkaiko Foru Aldundiak konpromiso irmoa duela enplegagarritasunaren alde. "Zuen ondoan gaude, Gobernuaren lehentasuna zarete. Berriki onartu berri ditugu 2024ko Bizkaiko aurrekontuak, eta gazteen enpleguan hiru milioi euro bideratu ditugu 3R Gaztea bezalako programetarako, edo Gazte Enplegua edo Gazte On bezalako programetarako. Zuen talentua eta energia behar ditugu ", amaitu zuen.