-
45.000 ikasle baino gehiagorekin hasi da 2024/2025 ikasturtea UPV/EHUn
-
UPV/EHUk Palestinako poeta baten olerkia gehitu du bere Poesia Pasealekuan
-
Gema Varona Biktimologiako Munduko Elkarteko lehendakari hautatu dute
-
Adimen artifizialak doitasun nanometrikoz detektatzen ditu minbizia eta infekzio biralak
-
Bederatzi urte ditut eta amaren mugikorra erabiltzen dut
UPV/EHUk mugikortasun programetako ikasleentzako agur ekitaldia ospatu du
Ikasturte honetan, beste unibertsitateetako 1.458 ikaslek hartu dute parte programa hauetan
- Albisteak
Lehenengo argitaratze data: 2024/05/10
![](https://www.ehu.eus/documents/10136/53134552/despedida-farewell_dest.jpg/9a03e70b-7949-a40f-7071-bc2bc4d588b0?t=1715339888185)
Letren Fakultatean, Gasteizen, Euskal Herriko Unibertsitateak mugikortasun programen bidez aurten UPV/EHUn ikasi duten ikasleentzako agur esateko ekitaldia ospatu da. Guztira, 2023-2024 ikasturtean, 1.458 ikaslek gutxienez lauhileko bat egin dute UPV/EHUn: Erasmus (821), Sicue (209), Latinoamerika (355) eta Beste norakoak (73).
Ekitaldian parte hartzen dute Eva Ferreira Euskal Herriko Unibertsitateko errektoreak; Junkal Gutiérrez Euskara, Kultura eta Nazioartekotzearen arloko errektoreordeak; eta Sonia Díaz de Corcuera Ruiz de Oña Vitoria-Gasteizeko Udalaren Kultura eta Hezkuntza Saileko zinegotzi ordezkariak.
Argazki ofiziala egin ondoren, errektoreak ongietorria eman die mugikortasun programa guztietan parte hartu duten ikasleei: “Eskerrik asko Euskal Herriko Unibertsitatean zuen konfiantza jartzeagatik. Eraman ezazue gure unibertsitateko oroitzapenik onena, hemendik aurrera ere zuena baita. Eta hori horrela izanik, beti aurkituko dituzue gure ateak zabalik”.
UPV/EHUn izandako esperientzia kontatzeko aukera izan du ekitaldian mugikortasun programako nazioarteko ikasle talde batek: Almendra Cona (Txile), Elena Andrianoba (Mosku) eta Giselle Mendoza (Kolonbia). Era berean, Bella Frost Danimarkatik etorritakoak, baina jatorri siriarrekoak, bertaratutakoei minutu bateko isilunea eskatu die Gazako tragediagatik, eta eskerrak eman dizkie Euskal Herrian eta UPV/EHUn jaso dituen elkartasun adierazpen eta ekimenengatik.
Ekitaldian, gainera, hainbat ikaslek UPV/EHUn izandako nazioarteko esperientzia kontatu dute, Unibertsitateko masterren eta Etxepare Institutuko aurkezpenak egin dira eta ESN ikasle-elkarteak bisitariei emandako laguntza eskertu da. Ondoren, kalejira egin da “El Caminante” eskulturara, eta Nazioarteko Harremanetarako Bulegoak eskainitako pintxoak dastatu dira, musika tradizionalarekin girotuak; ondoren, kontzertuak izan dira Arabako Campuseko Unibertsitate Pabiloian.
Esan den bezala, 1.458 ikaslek hartu dute parte UPV/EHUko mugikortasun programetan. Ikasle gehien dituzten herrialdeak hauek izan dira: Erasmus programan, Italia (223), Alemania (203) eta Frantzia (87); Latinoamerikan, Mexiko (127), Txile (98) eta Argentina (40); eta Beste Norakoak programan: Hego Korea (27), Estatu Batuak (9) eta Japonia (6). Sicue programako ikasleak Espainiako hainbat unibertsitatetatik datoz.
Ikasturte honetan, lehen aldiz, 'tandem linguistikoak' programa sortu da mugikortasun ikasleen eta bertako ikasleen artean. Helburua hizkuntzen erabilera hobetzea da. 179 ikaslek hartu dute parte ekimen horretan. Bestalde, mugikortasun ikasleei eskaintzen zaizkien hizkuntza ikastaroetan, 111k parte hartu dute euskara ikastaroetan eta 792 espainol ikastaroetan.