UPV/EHUko ikertzaileek immunoisolamendu zelularreko gailu biomediko bat sortu dute (mikrokapsulak), organismoan txertatu ondoren haren arrastoari jarraitzeko gaitasun intrintsekoa duena. Journal of Biophotonics aldizkariaren apirileko alearen azalerako aukeratu dute lana; nazioarteko aldizkari ospetsuenetako bat da hori, biomedikuntzan teknologia fotonikoen ezarpenari dagokionez.
Fluoreszentzia naturaleko gailu biomedikoak diseinatu dituzte, organismoan jarraipena egiteko
- Ikerketa
Lehenengo argitaratze data: 2019/05/02
![](https://www.ehu.eus/documents/10136/0/2019_05_02_journal_web2.jpg/565ad770-2943-53ab-8688-63b84710b1d3?t=1556809892000)
Universidad del País Vasco/Euskal Herriko Unibertsitateko NanoBioCel taldeko ikertzaileek, Michiganeko Unibertsitatekoekin (AEB) batera, immunoisolamendu zelularreko gailu biomediko bat sortu dute (mikrokapsulak), organismoan txertatu ondoren haren arrastoari jarraitzeko gaitasun intrintsekoa duena. Diseinu berritzaile horrek genipina izeneko substantzia natural bat du, zeinak fluoreszentzia bizi eta egonkorra igortzen duen gorri urrunaren mailan.
Hidrogel txertatuetan oinarritutako biosistemen monitorizazio ez-inbaditzaileak ibilgailua edo karga zeharka markatzea eskatzen du oro har, eta horrek areagotu egiten ditu bai konplexutasuna eta bai funtzionalitatea asaldatzeko arrisku potentziala. Aurrenekoz, ikertalde honek frogatu du posible dela, jarraipen ez-inbaditzailea egiteko, gaitasun intrintsekoak dauzkaten biomaterialetatik abiatuta hidrogeletan oinarritutako biosistemak sortzea; kasu honetan, genipina erabiliz.
“Garrantzitsua da kontuan izatea orain arte inork ez duela genipinak igorritako fluoreszentzia naturala baliatu, izaki bizidunetan txertatutako terapia zelularretan monitorizazio ez-inbaditzailea egiteko sistema gisa –nabarmendu dute ikertzaileek–. Lehen mugarri gisa, immunoisolamenduko gailu berritzaile bat sortu dugu, diseinuan genipina duena; horrela, organismoan txertatzen den une beretik jarrai diezaiokegu haren arrastoari. Prozedura azkar, eraginkor eta ez-zitotoxiko baten bidez, mikrokapsulen fluoreszentzia maximizatzea lortu dugu, seinale/zarata harreman bikainarekin. Gainera, genipina irudi kuantitatiboko zunda gisa erabiltzeko modua balidatu dugu, eta frogatu dugu fluoreszentzia bizi eta egonkorra lortzen dela, seinalearen linealtasun ona duena, hainbat astetan txertatutako mikrokapsulen dosien aurrean. Estrategia horren bidez, injektatutako dosi erreala berehala ebaluatzea lortu dugu, bai eta dosi horren posizioa denboran zehar kontrolatzea ere; horrek nabarmen hobetzen ditu terapiaren biosegurtasuna eta eraginkortasuna”.
Ideia horrek, gainera, aplikazio potentzial arrakastatsua izan dezake hidrogeletan oinarritutako nano, mikro eta makro teknologien industrian. Horrelako piezak oinarrizkoak izango dira bai ikerketa biomedikorako eta bai medikuntza klinikoak aurrera egiteko, besteak beste ehunen ingeniaritzan eta medikuntza birsortzailean aplikatuz. “Fluoreszentzia irudiko sistemak praktika klinikoan apurka-apurka txertatzen joaten diren heinean, gure proposamena aplikagarritasun arrakastatsua izatera hel daitekeela iruditzen zaigu, hidrogeletan oinarritutako bioteknologia askoren aurrerapenean, hala nola farmako, zelula, txerto eta biosentsoreak administratzeko sistemetan”, adierazi dute.
NanoBioCel UPV/EHUko Farmaziako eta Farmazia Teknologiako Laborategiko ikertalde bat da eta bi erakunde hauetako kidea ere bada: CIBER-BBN (Bioingeniaritza, Biomaterialak eta Nanomedikuntza Sareko Ikerketa Biomedikoko Zentroa) eta Nanbiosis-ICTS azpiegitura zientifiko tekniko singularra.
Erreferentzia bibliografikoa
- Monitoring implantable immunoisolation devices with intrinsic fluorescence of genipin
- Journal of Biophotonics (April 2019)
- DOI: 10.1002/jbio.201800170