-
45.000 ikasle baino gehiagorekin hasi da 2024/2025 ikasturtea UPV/EHUn
-
UPV/EHUk Palestinako poeta baten olerkia gehitu du bere Poesia Pasealekuan
-
Gema Varona Biktimologiako Munduko Elkarteko lehendakari hautatu dute
-
Adimen artifizialak doitasun nanometrikoz detektatzen ditu minbizia eta infekzio biralak
-
Bederatzi urte ditut eta amaren mugikorra erabiltzen dut
Matematikak ikasgelatik kanpo esperimentatzea
Pablo Fusto palistak Matematikaren Didaktika irakasgaiko saio batean parte hartu du, Elena Agirre irakaslearekin batera
- Erreportajeak
Lehenengo argitaratze data: 2023/03/30
![Pablo Fusto bere hitzaldia ematen](https://www.ehu.eus/documents/10136/43206688/pablo-fusto_web.jpg/0df468e1-416c-1e26-2701-6cb1b2d77470?t=1680158514902)
Pablo Fusto palista profesionala da, eta kirol ibilbide bikaina du bizkarrean. Larruzko palako banakako zazpi txapelketaz gain, munduko txapelketetako lehen postuak lortu ditu, bai banaka bai binaka. Bigarren urtez, Elena Agirre irakaslearekin batera, 'Matematikaren Didaktika' irakasgaiko saio bat eman du Lehen Hezkuntzako graduan. Saio hori Lehen Hezkuntzako ikasleekin (6-12 urte) egiteko baliabide didaktiko baten barruan kokatzen da. Pablo Fustoren aurkezpenak gaitasun matematikoaren garapenarekin zuzenean lotutako gaiak planteatzeko aukera ematen du, baita praktikatzen duen kirolari buruzko informazioa emateko ere. Bien bitartean, eskolako curriculumean jasotako ezagutza matematikoa integratzen du, batez ere 'Magnitudea eta neurria'ri dagokion blokekoa.
Jarduera horren helburua da etorkizuneko maisu eta maistrei matematika irakasteko eta ikasteko interesa eta motibazioa areagotzea. “Oso pozik nago, egiten dugun bigarren urtea da, eta asmoa da pilotaren mundua matematiketan txertatzea. Ideia ona iruditu zitzaidan. Gainera, gure kirola gazteen artean sustatzeko beste modu bat da, pilota, kirola bere osotasunean hartuta, ikusgarri egiteko", aitortu du Fustok.
Saioan, palaren munduan izan duen ibilbide profesionala, modalitatez nola aldatu eta eboluzionatu zuen eta gaur egun dagoen tokian nola amaitu zuen aztertzen du. Existitzen diren modalitate motak, pilota motak, tresnak, eszenatokiak, palen eta frontoien neurriak eta palaren mundua zer den azaltzeko aprobetxatzen du saioan, betiere matematiken ikuspegitik.
Sinismen faltsuak
Elena Agirrek dioen moduan, matematika urruneko zerbait delako uste faltsu hori albo batera utzi nahi da, eta kirolean eta, zehazki, palaren munduan presente daudela erakutsi. “Lehen Hezkuntzako edukiei dagokienez, oso ondo integratzen da curriculumaren eduki multzoekin. Palaren testuinguruan zenbakiak eta eragiketak landu daitezke, neurrien gaia landu daiteke, geometriarena, informazioaren tratamenduaren erabilerarena… Pablok ematen duen hitzaldiarekin, Lehen Hezkuntzako bigarren ziklo batera egokitu daitekeen eta etorkizuneko maisu eta maistrek ikusarazi behar duten informazioaren tratamenduarekin, lortu dituen lorpenak azter daitezke. Ikasleek ikus dezaten matematikaren eta beste esparru batzuen artean, kirola kasu, lotura dagoela”.
Elena Agirre: «Matematikei beldurra gal diezaioten nahi dut, eta ikasgelatik kanpo esperimenta daitezkeela erakutsi»
Matematikak abstraktua den zerbait direla pentsatzen dugu, baina inguruan dugun guztian aurki ditzakegu. “Atzo bertan, bikotekako entrenamendu batean, jokalarien arteko distantziak kantxan zer garrantzia duen azaldu zuen. Esan zuen jokalariek frontoiko koadroetan jarri behar dutela arreta, kokatzeko eta pilota itzultzeko ahalik eta espazio gehien hartzeko”. Profesionalek oharkabean egiten dute hori. Frontoiko espazioan kokatzea oso garrantzitsua da haientzat, eta kontzeptu hori matematikako gaitasunetan ere lantzen da Lehen Hezkuntzan.
Txapeldun argentinarrak esaera bat du hasieratik: irakatsiz ikasten da. Printzipio horri jarraitzen dio Agirre irakasleak ere bere ikasleekin. “Irakasten irakatsi behar da, eta hori lortu nahi dut nire ikasleekin. Matematikak irakasten irakatsi nahi diet, matematikei beldurra gal diezaioten irakatsi, eta matematikak leku askotan daudela ikus eta esperimenta ditzaten, hala nola baratzean egiten dugun jardunean. Palari dagokionez, adibidez, Pablo hizlari gonbidatu gisa etortzen bada, emaitza hobeak lortzen dira, hori frogatuta dago, gehiago iristen zaie, eta lortu dugunaren berri eman dezakegu. Matematikak ikasgelatik kanpo esperimenta daitezke”.