-
45.000 ikasle baino gehiagorekin hasi da 2024/2025 ikasturtea UPV/EHUn
-
UPV/EHUk Palestinako poeta baten olerkia gehitu du bere Poesia Pasealekuan
-
Gema Varona Biktimologiako Munduko Elkarteko lehendakari hautatu dute
-
Adimen artifizialak doitasun nanometrikoz detektatzen ditu minbizia eta infekzio biralak
-
Bederatzi urte ditut eta amaren mugikorra erabiltzen dut
Bakean Elkarrekin Bizitzeko Nazioarteko Eguna: CRUE – Espainiako Unibertsitateen manifestua
Lehenengo argitaratze data: 2024/05/15
![](https://www.ehu.eus/documents/10136/52932803/crue-convivencia-paz_web.jpg/eb4fd5a9-61dd-d658-fe77-0c7c5c46ac53?t=1715669786944)
Nazio Batuen Batzar Nagusiak, 2018ko abenduaren 8ko 72/130 erabakiaren bidez, Bakean Elkarrekin Bizitzeko Nazioarteko Egun izendatu zuen maiatzaren 16a. Aldarrikapen horren helburua da diskriminazioa eta tolerantzia eza ezabatzeko beharra azpimarratzea eta, era berean, ikusaraztea jendarte zibilak ahalmen handia duela (arlo akademikoan bereziki) erlijio eta kulturen arteko elkarrizketa sustatzeko. Bide horretan, jendarte zibila mugiarazteko neurriak har daitezen bultzatu nahi da, adierazpen honen garrantziaz kontzientziaraziz, elkarrizketan oinarritutako jarduerak antolatuz edo lankidetzarako esparruak sortuz.
Hori horrela, CRUEk berretsi egin nahi du bizikidetza baketsuaren eta elkarrekiko errespetuaren alde hartutako konpromisoa, sinetsita baitago hori dela bakea, tolerantzia, inklusioa, elkar ulertzea eta elkartasuna bultzatzeko bidea. Helburu hori bereziki egingarria da goi mailako hezkuntza erakundeetan, bertan biltzen baitira jatorri, kultura, sinesmen, ikuspegi eta ideologia ezberdinetako pertsonak. Aniztasun horrek nabarmen aberasten du gure ingurune akademikoa, eta elkarrekin bizi eta ikasten jarraitzeko aukera ematen digu.
Zoritxarrez, gatazka, sumindura eta konfrontazioa ohikoak dira gaur egun eta, horregatik hain zuzen ere, itxaropenaren argi izan behar dute gure unibertsitateek; mundu hobe bat eraikitzea posible dela erakutsi behar dugu. Aldaketaren eragile izan behar dugu eta, horretarako, inguru inklusiboak sustatu behar ditugu, non errespetua, elkarrizketa eta elkar ulertzea izango diren irakaskuntza, ikerketa, transferentzia eta berrikuntzaren oinarri nagusiak. Laburbilduz, norbanakoak baloratuta eta errespetatuta sentitzeko moduko espazioak sortzen saiatu behar dugu, diskriminazio, gorroto edo indarkeria mota oro arbuiatuta.
Agerian geratu da jakintza arlo ezberdinen arteko lankidetza (zientzien eta giza zientzien artekoa, kasu) formula arrakastatsua izan dela aurrerapen sendo, iraunkor eta gizatiarra ahalbidetzeko. Beraz, jendarte osora zabal dezagun gure campusetan hauspotzen dugun elkarbizitza; erakuts dezagun aliantza horien oinarri diren balioak eraginkorrak direla gatazkak saihesteko edo, behar denetan, konpontzeko. Gaur, hortaz, berretsi egiten dugu bakearen, bizikidetzaren eta aurrerabidearen alde hartu genuen konpromisoa, etorkizun oparoa izan dezagun bai gure unibertsitateetan bai mundu osoan.