-
45.000 ikasle baino gehiagorekin hasi da 2024/2025 ikasturtea UPV/EHUn
-
UPV/EHUk Palestinako poeta baten olerkia gehitu du bere Poesia Pasealekuan
-
Gema Varona Biktimologiako Munduko Elkarteko lehendakari hautatu dute
-
Bederatzi urte ditut eta amaren mugikorra erabiltzen dut
-
Adimen artifizialak doitasun nanometrikoz detektatzen ditu minbizia eta infekzio biralak
Ukrainatik eta Afganistandik etorritako ehun ikasle baino gehiago G-9ko unibertsitate publikoetan trebatu dira
Nazioarteko Harremanen Batzordeak azken aldiko krisien ondorioz hasitako ekintzen balantzea egin du
- Albisteak
Lehenengo argitaratze data: 2022/10/21
![](https://www.ehu.eus/documents/10136/39782046/g9-internacionales_web.jpg/3607faf3-9d4f-4e67-3301-5f12e7336ba7?t=1666957890450)
Aste honetan Euskal Herriko Unibertsitatearen Arabako Campusean bildu dira 9 Unibertsitateen taldeko (G-9) Nazioartekotze eta Lankidetza Errektoreordetzetako arduradunak, eta taldeko unibertsitate publikoak dauden autonomia-erkidegoetara iritsi diren Ukrainako eta Afganistango biztanleekin egiten ari diren ekintzak bateratu dituzte. Eman dituzten zifren arabera, bi herrialdeetatik etorritako 100 ikasle baino gehiago ari dira joan den ikasturtetik unibertsitate horietan prestatzen, graduko eta masterreko ikasketetan edo atzerritarrentzako espainierazko programa espezifikoetan, ondoren ikasketa arautuetan sartzeko aukera izan dezaten.
Nazioarteko Harremanen Batzordea, Angel Pazos Kantabriako Unibertsitateko errektorea buru duela, G-9ko unibertsitateetan matrikula-tasa publikoak salbuesteko lanetan ari da, joan den ikasturtetik, autonomia-erkidegoetako gobernuekin koordinatuta, Ukrainatik eta Afganistandik eta gatazkan dauden beste eskualde batzuetatik joandako ikasleak. Era askotako ekintzak ere egiten dituzte, titulazio ofizialetarako sarbidea errazteko eta elkartearen campus digitalek eskaintzen dituzten baliabideak erabiltzeko.
«G-9ak unibertsitateen arteko estrategia hori premiazko erantzun gisa diseinatu zuen, eta, estrategia hori gauzatzeko zailtasunak izan arren, gure ustez lehentasunezkoenak diren arloei erreparatzen jarraitzen du, gure unibertsitateetan prestakuntzarekin jarraitu nahi duten ahalik eta pertsona gehienengana iristeko», adierazi du Pazos errektoreak.
Mahsa Amini ikasle irandarraren heriotza gaitzetsi dute
Sektoreko kideek giza eskubideekiko eta norbanakoaren askatasunarekiko konpromisoa berretsi dute, eta, horregatik, gogor gaitzetsi dute Mahsa Amini ikaslearen atxiloketa, Iranen beloa ez eramateagatik, eta ondoren hiltzeagatik. Izan ere, herrialdean inoiz izan ez den protesta oldea piztu du horrek.
Unibertsitateen arteko I. Eztabaida Liga ingelesez eta Garapenerako Lankidetzako Doktorego Tesien V. Saria
G-9ak Unibertsitateen arteko Ingelesezko I. Eztabaida Liga abian jartzea onartu du. Liga horren azken fasea 2023an izango da, Oviedoko Unibertsitatean, eta bederatzi erakundeetako ikasleen eztabaida-taldeek parte hartuko dute. Liga hori G-9aren Unibertsitateen arteko Eztabaida Ligaren osagarria izango da, gaztelaniaz. Jarduera horrek ezarpen zabala izan du duela 12 urtetik.
Era berean, sektoreko kideek oniritzia eman diote Garapenerako Lankidetzako Doktorego Tesien V. Sariaren deialdiaren testuari. Aurtengo edizioan, sarira aurkezten diren Espainiako unibertsitate publikoen tesien artean, Gizarte Eraldaketarako Hezkuntzako lanik onena sarituko da.
Bileran, Taldea Kolonbiako eta Marokoko beste erakunde eta unibertsitate-sare batzuekin egiten ari den beste proiektu batzuen balantzea egin da.
9. Taldeak Europar Batasunetik bultzatutako Erasmus Without Paper (EWP) delakoaren garapenak dakartzan zailtasun ugariak aztertu ditu. Kezka handia agertu dute ekimena nola gauzatzen ari den ikusita, eta prozedurak argitzeko eskatu dute, Bruselak ezarritako epeak bete ahal izateko.
9 UNIBERTSITATEEN TALDEA
9 Unibertsitateen taldea (G-9) honako hauek osatzen dute: Kantabriako Unibertsitatea, Gaztela-Mantxako Unibertsitatea, Extremadurako Unibertsitatea, Balear Uharteetako Unibertsitatea, Errioxako Unibertsitatea, Oviedoko Unibertsitatea, Euskal Herriko Unibertsitatea, Nafarroako Unibertsitate Publikoa eta Zaragozako Unibertsitatea. Elkartearen helburua da taldeko unibertsitate-erakundeen arteko harremanak indartzea, besteak beste, unibertsitate-komunitatearen irakaskuntza- eta ikerketa-jardueretan lankidetza sustatzeko.