Masterraren Gakoak
Paisaiaren Europako Hitzarmenak honela definitzen du paisaia: populazioak halakotzat duen lurraldearen edozein eremu, naturaren eta gizakien ekintza eta interakzioaren bidez sortzen dena.
Paisaiak dimentsio asko ditu eta hainbat kontzeptu biltzen ditu, hala nola ondarea, lurraldea eta hiria, eta beharrezkoa du bera babestu eta antolatuko duten politikak definitzea eta aplikatzea. Horretarako, bada, paisaiaren babesarekin, kudeaketarekin eta antolamenduarekin lotutako prozesuei heltzeko gaitasuna duten pertsonak behar dira.
Paisaiaren Kudeaketa: Ondarea, Lurraldea eta Hiria Masterraren bidez, ikertzaile akademiko eta profesionalak trebatu nahi dira halako eran non gai izango diren lurraldearen antolamenduarekin, ekosistemen iraunkortasunarekin, landa-hiri continuumarekin, kulturarekin eta ondarearen balorazioarekin lotutako behar gero eta handiagoei erantzuteko, nekazaritzako eta basogintzako jarduerak, biodibertsitatea, geodibertsitatea eta kimika ere barne hartuz.
Prestakuntza programaren bidez, paisaiari, ondareari, lurraldeari eta hiriari buruzko diagnostiko eta azterketa prospektiboak egiteko elementu teoriko eta metodologiko guztiak ikasiko dira, horien ezaugarriak eta ingurunearekin duten lotura kontuan hartuz. Alde horretatik, erakutsi nahi da paisaia baliagarria dela bitarteko natural, kultural, ekonomiko eta pedagogiko gisa, eta, horretarako, ingurumeneko arazoak detektatzeko, kuantifikatzeko eta zuzentzeko azterketa eta analisi metodologia egokienak landuko dira.
Gainera, ondare elementuen kontserbazioan esku hartzeko beharrezko ezagutzak eskuratuko dira, eta horren ondorioak aztertuko dira diziplina anitzeko ikuspegi batetik eta babesari buruzko alderdi etikoak aintzat hartuz.
Master hau eginez gero, Diziplinarteko Estrategia Zientifikoak Ondarean eta Paisaian Doktorego Programa egin daiteke zuzenean.
UFI Global Change and Heritage-k sustatzen du master hau, Kultur Paisaiak eta Ondarea UNESCO Katedraren babesarekin eta CSIC Ondarearen Zientzien Institutuaren eta Getxoko Udalaren laguntzarekin.
