Zientzia Astearen, UPV/EHUko Zientzia, Teknologia eta Berrikuntzaren Astearen, hogeita batgarren edizioa hasi da. Euskal gizartea mundu zientifiko eta teknologikora erakartzea helburu duten jarduera ludiko eta pedagogikoz beteriko programa eskainiko du ekimen honek. Azken hilabeteetako egoera sozio-sanitarioaren bilakaera positiboak jardueren presentzialtasuna berreskuratzeko urratsak egitera bultzatu du, betiere zuhurtziari eutsiz.

Edizio honetan, beraz, hiru lurralde historikoetako egoitzak berreskuratuko ditugu: Bilbo, Gasteiz, Donostia eta Barakaldo. Horietan 150 txanda baino gehiago programatu dira aurrez aurreko jardueretan, eta 30 aukera eskaintzen dira jarduera birtualetan.

3.500 pertsonak baino gehiagok parte hartu ahal izango dute eskaintza presentzialean

Joan den urteko etenaldiaren ondoren, 3.500 pertsonak baino gehiagok parte hartu ahal izango dute eskaintza presentzialean: tailerretan, txango didaktikoetan, erakusketetan, hitzaldietan eta ikuskizunetan. Horien artean, Zientzia Club nabarmentzen da, zientzia eta umorea uztartzen dituzten bakarrizketak. Jarduera guztiak doakoak dira eta aldez aurretik izena eman behar da tailer, hitzaldi, txango eta bisita gidatuen eskaintza presentzialean, baita online tailer batzuetan ere. Asko beteta dauden arren, oraindik plaza libreak daude.

Aurrez aurreko jardueren eskaintzaz batera, online jarduera ugari eskaintzen dira publiko guztientzat. Edizio honetan, gainera, ikastetxeentzako online jarduerak programatu dira: 23 hitzaldi labur, Zientzia Zirkularra izenekoa, eta 2 tailer, Lehen Hezkuntzako, Bigarren Hezkuntzako eta Batxilergoko ikasleentzat. Hitzaldi eta tailer horietan UPV/EHUko ikerlariek parte hartuko dute. Besteak beste, energia berriztagarriak, biofindegiak, plastikoak, material berriak, antibiotikoak, elikadura eta nutrizioa, kutsadura eta estatistika hurbilduko dizkie ikasleei.

Publiko guztientzat, 4 egoitzatan

Bilbon, Bizkaia Aretoak 37 jarduera hartuko ditu azaroaren 5etik 7ra. Zientziarekin eta ezagutzarekin lotutako 22 txoko tailer izango dira, hala nola eguzki sistema, itsas zientziak, kutsadura, paleontologia eta arkeologia, besteak beste, jorratuko dira. Horrez gain, hiru hitzaldi emango dira, lehenengoa, historian zehar egondako klima aldaketaren prozesuak ulertzeko saioa izango da; eta bigarrena, gaur egun ere Ponpeiako freskoek, Vesubioren erupzioaren ondoren, sortzen dituzten misterioen inguruan arituko da. Urtero bezala, Zientzia Astea Bizkaia Aretotik kanpo ere egingo da, hala: 11 ibilbide didaktikoekin Bilboko itsasadarraren estuarioa eta itsasadarraren inguruko eraldaketa ezagutaraziko da, besteak beste; bestalde, partikulen azeleragailu bat edo behatoki astronomiko bat ezagutzeko aukera ere izango da.

Zientzia Astea ere Barakaldoko Clara Campoamor Gizarte Etxean egingo da azaroaren 3tik 7ra. Hilaren 3an bertan, publiko ezberdinei zuzendutako ekitaldiz beteriko eguna izango da, arteari buruzko hitzaldi bat, forma eta koloreak matematikoki erlazionatzen dituen horma-irudi baten inaugurazioa, Ramon Rubial Lorategi Botanikora bisita-solasaldi bat eta ikasleentzako tailerrak izango dira. Bi erakusketek luzatzen dute udalerri honen eskaintza: hiriko txirrindulariak, 2tik 12ra, eta Garapen Jasangarriko Helburuak 17+1.

Bestalde, Zientzia Astea azaroaren 5etik 7ra izango da Donostian, Tabakaleran, 24 jarduerekin. 12 tailer izango dira, horietan, besteak beste, honako hauek proposatuko dituzte: eraikinetako energia-eraginkortasunari buruzko erakustaldiak, giza eta animalia-hezurduraren arteko desberdintasunak ezagutzea, egun batez detektibe izatea edo The Game of Brainy Roles pelikulan rolen interpretazioan aritzea. Gainera, 8 ibilbide didaktiko egingo dira: mikroplastikoak sailkatuko ditugu MATER Barco-Museo Ecoaktiboan, Energia Berriztagarriei buruz gehiago jakingo dugu Eibarko Ingeniaritza Eskolan eta 40ko hamarkadan eskola bat nolakoa zen ikusiko dugu, beste gai liluragarri batzuen artean. Hitzaldiak eskeletoetan aplikatutako robotikarekin eta espazioko eguzki hegaldiekin inguruan izango dira.

Vitoria-Gasteizen, Zientzia Astea Bibat Museoan izango da, azaroaren 4tik 7ra, eta 61 jarduera izango dira: hala, 48 tailer egingo dira, elikadura, eskuak garbitzea, fisika edo, agian, magia eta kriminalistika bezalako gaietara hurbiltzeko. Vitoria-Gasteizko hiri-geografiari buruzko hitzaldi batean parte hartu ahal izango dugu, baita Arabako memoria historikoari buruzko mahai-inguru batean ere. 5 ibilbide didaktiko egingo dira Zadorrako ibai-paisaia eta San Pedro mendiko aztarna arkeologikoak ezagutzeko, besteak beste.

Jarduera guztiak doakoak dira eta aldez aurretik izena eman behar da

Zientzia Asteko egitaraua osatzeko, ikuskizun zientifikoz batez, hau da Jon Kepa Eureka, gozatzeko aukera izango dugu lau hirietan, eta bi lehiaketa jarri dira abian: Argazkigintza Geologikoaren XIII. Lehiaketa eta Erretratu Alfabetiko-matematikoaren Lehiaketa. Gainera, Emakumeak Ozeanoen Ikerketan Ginkana duzue eskura une oro, emakumezko ikertzaileei buruz gehiago ikasteko. Bestetik, aurreko urteetako arrakasta ikusita, Zientzia Clubez gozatzeko aukera izango dugu aurten ere, gai eta bakarrizketari berriekin. Umorea eta zientzia dira Zientzia Club formularen bi osagaiak.

Jarduera guztiei buruzko informazioa Zientzia Astearen webgunean.

Zientzia Astea UPV/EHUk antolatzen du, Eusko Jaurlaritzaren, Arabako Foru Aldundiaren, Gipuzkoako Foru Aldundiaren, Donostiako Udalaren, Gasteizko Udalaren, Barakaldoko Udalaren, Metro Bilbaoren eta Vital Fundazioaren laguntzarekin.